Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист ко причащению Святых Таин


Православные акафисты

Акафист ко причащению Святых Таин

Кондак 1

Избранный Женише душ и сердец, вочеловечением Совим и смертию на кресте обручивый Себе на веки весь род человечь, и давый нам в залог вечныя жизни самое пречистое тело и кровь Свою, се по гласу Твоему и аз недостойный, дерзая, прихожду к божественней трапезе Твоей, и поражен величием ея, вопию: Иисусе, Боже сердца моего, прииди и соедини мя с Тобою на веки.

Икос 1

Ангела Твоего к провидцу Исаии со углем горящим от алтаря небеснаго послал еси, во еже очистити тем устне его, егда видев Тя, сидяща на престоле, о нечистоте своей скорушашеся: аз же, оскверненный душею и телом, како дерзну приступити ко причащению Божественных Твоих Таин, аще не Ты Сам очистише мя свыше? Темже из глубины души вопию Ти:

Иисусе всеблагий, коснися углем благодати Твоея и моих несичтых устен.

Иисусе, попали терние моих многих прегрешений.

Иисусе, созижди во мне сердце чисто и обнови во утробе моей дух правый.

Иисусе, изведи из темницы страстей бедную душу мою.

Иисусе, потреби во мне нечистыя помыслы и злая похотения.

Иисусе, направи слабая стопы моя на путь заповедей Твоих.

Иисусе, Боже сердца моего, прииди и соедини мя с Тобою на веки.

Кондак 2

Желанием возжелевый ясти со ученики последнюю пред страданием Твоим пасху, да преподаси им среди ея последний и наибольший залог любве Твоея, прежде двою днию предпослал еси два от них во Иерусалим, да шедше уготовают ю. Поучаяся отсюду, как и нам подобает благовременне уготовляти себе к снедению нашея Божественныя пасхи, сиречь тела и крове Твоея, благодарственно зову Ти: Аллилуиа.

Икос 2

Изуй сапоги от ногу твоею, земля бо, на нейже стоиши, святая есть, рекл еси Моисею из купины, горевшия и несгаравшия, от невидимаго в оной присутствия Твоего. Сосуд с божественным телом и кровию Твоею воистину более и святее неопалимыя купины есть: аз же перстень, нечист, продан под грех. Темже со смирением и верою вопию Ти:

Иисусе всемогущий, совлецы мя ветхаго человека с деяньми его.

Иисусе, умертви семя тли во мне гнездящееся.

Иисусе, разторгни узы грехи, ими же связа мя враг.

Иисусе, подаждь ми сердце смиренно и дух сокрушен.

Иисусе, отжени от мене сокрушения и соблазны:

Иисусе, утверди мя в вере и любви к Тебе.

Иисусе, Боже сердца моего, прииди и соедини мя с Тобою на веки.

Кондак 3

Отцы ваши ядоша манну в пустыни и умроша: Аз есмь хлеб, сходяй с небесе, да аще кто яст от него, жив будетво веки: и хлеб, его же Аз дам, плоть Моя есть, юже Аз дам за живот мира – рекл еси Иудеом, искавшим видети от Тебе знамением с небесе, подобное манне Моисеове. Еже мы слышаще и сбытие предреченнаго видяще, со страхом зовем: Аллилуиа.

Икос 3

Востав с вечери, якоже повествует святый Иоанн, и препоясався лентием, умыл еси ноги учеником, научая сим, да не приступаем к божественней трапезе Твоей неомытии слезами покаяния во гресех наших. Ощущая презельную нужду сего таинственнаго омовения и скудость слез ожесточеннаго сердца моего, с Петром вопию Ти:

Иисусе преблагий, Сам ми омый не нозе токмо, но и руце и главу

Иисусе, обнажи предо мною бездну душевнаго моего растления.

Иисусе, разверзни во мне источник сокрушения сердечнаго

Иисусе, ороси мя каплями Твоего милосердия.

Иисусе, обвей мя страхом суда и мук вечных

Иисусе, возбуди совесть, спящую во мне, и укрепи глас ея.

Иисусе, Боже сердца моего, прииди и соедини мя с Тобою на веки.

Кондак 4

Не сей ли есть Иисус, сын Иосифов, Егоже мы знаем отца и матерь? Како убо глаголет Сей, яко с небесе снидох? И како может дати нам плоть Свою ясти? – глаголаху между собою Жидове, услышавше о преславнем обещании Твоем датися в снедь вернем, не ведуще, по окаменению сердец своих, со смирением веровати и взывати к Тебе: Аллилуиа.

Икос 4

Аще не снесте плоти Сына Человеческаго и не пиете крове Его, живота не имате в себе, просвещал еси косным во еже веровати Иудеом, еже слово жестоко к слышанию показася и некиим от ученик Твоих, неведущим еще таин Царствия Божия. Мы же, озареннии светом Евангелия и откровенным лицем божественную славу Твою зряще, с верою и любовию зовем Ти:

Иисусе, вся могий величеством силы и державы Твоея.

Иисусе, творяй и совершаяй паче, неже можем разумети и помыслити.

Иисусе, манну с неба некогда, в знамение настоящего таинства, одождивый.

Иисусе, ко прообразоанию тогожде воду из камне источивый.

Иисусе, облак крастелей в напитание алчущим в пустыни Иудеом пославый.

Иисусе, пред очию самых сомнящихся Иудеев, пятию хлебы пять тысящ народа насытивый.

Иисусе, Боже сердца моего, прииди и соедини мя с Тобою на веки.

Кондак 5

Ядущим на вечери учеником, прием хлеб, благословив и преломив, подал еси им, рек: примите, ядите, сие есть Тело Мое, за вы ломимое, во оставление грехов. Потом же чашу подав, рекл еси: пийте от нея вси: сия есть Кровь Моя, за вы изливаемая, во оставление грехов. Сему божественному и пресладкому гласу внемлюще, со благодарением зовем: Аллилуиа.

Икос 5

Ядый Мою плоть и пияй Мою кровь во Мне пребывает, и Аз в нем: той имать живот вечный, и Аз воскрешу его в последний день, си есть в воскресение живота и блаженства. Сего убо вожделеннаго воскресения в живот ищя сподобитися, из глубины души вопию Ти:

Иисусе, приблизися ко имущему соединения с Тобою.

Иисусе, вниди во утробу, во вся составны и вся кости моя.

Иисусе, буди светом моего помраченнаго ума.

Иисусе, наполни Собою ненасытимую всем миром бездну моего сердца.

Иисусе, вещай гласом моея совести.

Иисусе, движи и управляй моею волею

Иисусе, Боже сердца моего, прииди и соедини мя с Тобою на веки.

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Аминь, аминь, глаголю вам: един от вас предаст Мя, рекл еси в скорби духа учеником Твоим на вечери. Они же, аще и чисти от замысла предания, еда аз есмь, вопрошаху Тя кийждо, показующе сим глубину своего смиренномудрия. Аз же что реку Ти, семижды на день падаяй и изменяяй Тебе? Обаче Ты Сам соблюди мя, да не отпаду в конец, взывая Ти благодарне: Аллилуиа.

Икос 6

Якоже розга не может плода творити о себе, аще не будет на лозе, тако и вы, аще во Мне не пребудете: а иже будет во Мне и Аз в нем, той сотворит плод мног: сице, тайнодействуя, поучал еси возлюбленныя ученики Твоя на пути в Гефсиманию. Сему убо наставлению внемля и ведый немощь естества моего без благодати Твоея, прилежно вопию Ти:

Иисусе, пренебесный делателю, Сам мя всади в живоносный вертоград Твой.

Иисусе, лоза истинная, прикрепи мя к Тебе, яко розгу дикую.

Иисусе, кореню неизсыхающий, исполни мя соком жизни вечныя.

Иисусе, победителю всякия мертвенности, отреби еже изсохло есть во мне от зноя страстей.

Иисусе, красный добротою, украси мя цветами благих чувств и помышлений.

Иисусе, богатый в милости, ущедри мя плодами истиннаго покаяния и правды.

Иисусе, Боже сердца моего, прииди и соедини мя с Тобою на веки.

Кондак 7

И кто есть предаяй Тя, вопросившу ученику, иже возлеже на вечери на персех Твоих, - той есть, отвещал еси, емуже Аз, омочив в солило хлеб, подам. И омочь хлеб, подал еси Иуде Симонову Искариотскому, подвизая его на покаяние: он же, ожесточен сый духом злобы, не восхоте разумети гласа любве своего Учителя и Господа. Каковаго жестокосердия да буду избавлен благодатию Твоею, зовя ти выну: Аллилуиа.

Икос 7

Щадя немощь естества нашего, отвращающегося вкушения плоти человеческия, не яве, но под видом хлеба и вина благоволил еси преподати нам пречистое Тело и Кровь Твою. Чудяся о таковом снизхождении премудрости Твоея к немощи естества нашего, благодарне славословлю Тя сице:
Иисусе, премудре и человеколюбне строяй все дело спасения нашего:

Иисусе, самая спасительная таинства Твоея приспособляяй к немощи нашего разумения и чувств.

Иисусе, во уверение сомнящихся, на святей трапезе многажды вместо хлеба и вина самое тело и кровь Твою проявивый.

Иисусе, достойным служителем олтаря Духа Пресвятаго, на освящение даров сходяща, показавый.

Иисусе, вместо недостойных служителей ко олтарю Ангелов Твоих невидимо, для совершения божественнаго таинства, посылаяй.

Иисусе, явлением чудес на святей трапезе, многия из самых зловерных ко вере обративый.

Иисусе, Боже сердца моего, прииди и соедини мя с Тобою на веки.

Кондак 8

И по хлебе, сиречь по вкушении от поданнаго Тобою хлеба предателю, якоже повествует святый Иоанн, вниде вонь сатана. Оле страшныя казни за неверие! Оле злополучнаго жребия предателя! Еже во спасение долженствоваше быти, в смерть и погибель ему обретеся. Пред таковым убо судом правды Твоея благоговея, со страхом и трепетом зову Ти: Аллилуиа.

Икос 8

Сие творите в Мое воспоминание, рекл еси учеником Своим на вечери, преподав им под видом хлеба Тело, а под видом вина Кровь Свою. Темже убо, елижды от хлеба ядим и от чаши пием, смерть Твою возвещаем, по слову святаго Павла. Воспоминая убо ныне страдания Твоя, со умилением зову Ти:

Иисусе, в руце врагов Твоих для спасения мира Себе произвольне предавый.

Иисусе, легионом Ангелов в защиту Твою явитися не попустивый.

Иисусе, невернаго ученика воззрением на него и гласом алектора к покаянию обративый.

Иисусе, Каиафе и Пилату, неразумне вопросившим Тя ответа не давый.

Иисусе, со креста распеншим Тя у Отца отпущение грехов просивый.

Иисусе, Матери Твоей возлюбленнаго ученика премилосердне усыновивый.

Иисусе, Боже сердца моего, прииди и соедини мя с Тобою на веки.

Кондак 9

Иудо, лобзанием ли Сына Человеческаго предаеши? Воззвал еси горце ко ученику невеному, егда он прииде со спирою в вертоград Гефсиманский, ища предати Тя лобзанием. Обаче и сей преострый глагол не порази раскаянием души, во зле ожесточенныя. Ведый убо непостонство и моея воли, страшуся, да не дам Ти когда и аз неблагодарный лобзания Иудина. Ты Сам убо уркепи мя благодатию Твоею, да со благоразумным разбойником выну зову: Аллилуиа.

Икос 9

Отче, да вси едино будут: якоже Ты во Мне, и Аз в Тебе, да и тии в Нас едино будут, да и мир веру имет, яко аз от тебе изыдох: Тако возгласил еси в последней молитве ко Отцу. Сему пресладкому гласу Твоему последуя и о силе молитвы Твоея дерзая, с верою возглашаю Ти:

Иисусе, вся совокупляяй во едино, возсоедини всех нас неразлучне с Тобою и Отцем Твоим

Иисусе, вся примиряяй, даждь да будем вси единомыслени в вере и любви к Тебе.

Иисусе, не терпяй вражды и разделений, потреби злочестивыя ереси и расколы.

Иисусе, всех любяй и милуяй, собери воедино стадо и вся заблудшия овцы.

Иисусе, мир всем подаваяй, утоли зависть и пререкание между презывающими имя Твое

Иисусе, причащаяй ми самаго тела и крове Твоея, да буду воистину плоть от плоти и кость от костей Твоих.

Иисусе, Боже сердца моего, прииди и соедини мя с Тобою на веки.

Кондак 10

На вечери, в Кане Галилейстей, воду в вино претворив, первое сим знамение божественныя силы Твоея показал еси. Отходя же на крест, яко жених душ, последнее чудо любве верующим в Тя явил еси, претворив хлеб в тело Твое и вино в кровь Твою, имиже насыщаяся и аз в живот вечнй, благодарне зову Ти: Аллилуиа.

Икос 10

В день воскресения Твоего, двема от ученик Твоих спутешествуя во образе странника во Еммаус, поучал еси их о тайне страданий Твоих: онема же держастеся очи, да Тя не познаета, аще и сердце их горя бе в них от сладости словес Твоих. Егда же, преклонься на моление их, вшел еси с ними облещи, и благословив хлеб, подал еси им: абие отверзостеся има очи, да Тя познаета. Подобяся сим учеником, дерзаю и аз со смирением вознести к Тебе сицевый глас:

Иисусе долготерпеливый, не остави и мене единаго на пути жизни за скудость веры моея.

Иисусе, научи мя, якоже и онех, разумети пророчествия о Тебе и тайну благодатнаго соединения с Тобою.

Иисусе, согрей и воспламени, якоже онех учеников, и мое хладное сердце.

Иисусе преблагий, облязи и со мною, яко уже преклонился есть к вечеру день моея жизни.

Иисусе, даждь ми познати Тя воистину в настоящем преломлении таинственнаго хлеба и в питии от чаши.

Иисусе, сотвори, да и аз, познав силу любве Твоея, буду провозвестником оныя для благих братий моих.

Иисусе, Боже сердца моего, прииди и соедини мя с Тобою на веки.

Кондак 11

Побеждающему обещал еси дати ясти от древа животнаго, еже есть посреди рая Божия, и от манны сокровенныя. К сему вкушению на небеси, да будет ми приуготовлением на земли причащение тела и крове Твоея, к немуже аз недостойный ныне приступая зову: Аллилуиа.

Икос 11

Ядый и пияй недостойне, суд себе яст и пиет, не разсуждая тела и ерове Господни, вразумляет приступающих ко причащению небошественный Павел. Темже и аз страшуся и трепещу своего недостоинства: но, да не надолзе удаляяся Твоего общения, от мысленнаго волка звероуловлен буду, прихожду к Тебе со гласом таковым:

Иисусе, приими мя, якоже приял еси мытаря, блудницу и разбойника.

Иисусе, не возгнушайся внити под кров души моея, аще и весь пуст и пался есть.

Иисусе, разверзи и моя душевныя очи, якоже разверзл еси слепу от рождения.

Иисусе, прорцы и мне, якоже оному разслабленному: востани и ходи.

Иисусе, устави ток нечистых пожеланий души моея, якоже установил еси токи жены кровоточивыя.

Иисусе, уврачуй проказу души и совести моея.

Иисусе, Боже сердца моего, прииди и соедини мя с Тобою на веки.

Кондак 12

Завистию диавола, усты змия глаголавшаго, весь род человеческий вкушением от плода запрещеннаго рай погуби и смерти предадеся. Вкушением же от пречистаго Тела и Крове Твоея вси земнороднии паки вечныя сподобляются жизни и восходят на первое достояние: врачество бо от яда змиина и семя безсмертия есть причащение животворящих Таин Твоих. Темже благодарне зову Ти: Аллилуиа.

Икос 12

Се пред сосудом с божественными Тайнами Твоими предстою, злых же помышлений моих не отступаю: едина всемогущая благодать Твоя ободряет и привлекает мя. Темже, повергая себе в бездну милосердия Твоего, вопию:

Иисусе, призываяй к покою в Тебе всех труждающихся и обремененных, приими и мене, утружденнаго суетою мира.

Иисусе, пришедый призвати неправедныя, но грешныя на покаяние, разреши и мя от грехов и страстей моих.

Иисусе, исцеляяй всякий недуг и всякую язву, уврачуй раны и гноение души моея.

Иисусе, насыщаяй алчущия, насыти мя телом и кровию Твоею.

Иисусе, воскрешаяй мертвыя, оживи мя умершаго грехми.

Иисусе, победителю ада, извлецы мя из челюстей духа злобы.

Иисусе, Боже сердца моего, прииди и соедини мя с Тобою на веки.

Кондак 13

О пресладкий и всещедрый Иисусе, выну сходяй, яко манна с небесе, для питания душ и сердец наших в таинстве пречистаго тела и крове Твоея, сподоби мя неосужденно причаститися божественных Таин Твоих, да исцелен, насыщен, освящен и обожен Тобою на веки, благодарно зову Ти: Аллилуиа.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru