Православные акафисты / Акафист святителю Николаю Зарайскому

Православные акафисты

Акафист святителю Николаю Зарайскому

Кондак 1

Избранный Богом, о предивный чудотворче, свете ясный всему миру, похвальная приносим ти, грешнии раби твои, прославляюще твое пречудное изволение: пребывати образом своим в земли Рязанския хотяще, из страны дальния пришел еси, Николае, источаяй чудес море, сего ради имущя тя предстателя пред Богом, от всякаго зла нас соблюди, да сице именуя, зовем ти: Радуйся, Николае, Святителю великий, Зарайский Чудотворче.

Икос 1

Ангелу благовестителю уподобися ти еси, Николае, егда во сне явися служителю своему пресвитеру корсунскому и рече ему: Евстафие, восстани, поими образ мой и гряди в землю Рязанскую, аз бо тамо хощу чудеса творити и место то прославити. Мы же таковому промышлению твоему, о нас бывшу, дивляшеся, воспеваем ти:

Радуйся, Христа паче всех возлюбивый.

Радуйся, ближних ради, себе самаго позабывый.

Радуйся, всех чад православных любящий отче.

Радуйся, не токмо Мир-Ликии, но и всея России чудотворче.

Радуйся, благословение Рязанския земли иконою твоею ниспославый.

Радуйся, ею же страну нашу, яко бронею надежно оградивый.

Радуйся, чудесы твоими Православие в ней крепко утвердивый.

Радуйся, яко от восток, даже до запад хвально имя твое.

Радуйся, яко молитва твоя много может пред Богом.

Радуйся, мосте, имже от земли ко граду Вышняго преходим.

Радуйся, венче из роз любве и милосердия сплетенный.

Радуйся, по Боге и Богородице заступниче усердный.

Радуйся, Николае, Святителю великий, Зарайский Чудотворче.

Кондак 2

Видяще Евстафий таковое видение убояся и бысть в недоумении, по мале же времени паки явися Чудотворец таяжде повелевая. И в болий еще страх прииде, и глаголя в себе: камо пойду, зане ни страны Рязанския не знаю, ни пути, ни языка тоя земли, Богу же Всеведущему возгласи: Аллилуиа.

Икос 2

Разумом Божественным наставляющя, третицею явися ему Николае и рече: почто усумнися; гряди убо якоже на восток, путеводитель твой аз есмь: смутися зело пресвитер, егда помысли оставити град свой, сродники и ближния и паки мало позамедли. Подаждь, святый отче, и нам, помраченным умом, мысль благу, да разумеем, что на все есть воля Божия, благая и спасительная для нас, и окормляяй приведи нас к благодатней пристани спасения, поющих ти:

Радуйся, превеликий архиерею Божий.

Радуйся, всей вселенней похвало.

Радуйся, к тебе прибегающих пастырю добрый.

Радуйся, преславный Угодниче Христов.

Радуйся, недоумения житейския скоро разрешающий.

Радуйся, во благо все нам устрояющий.

Радуйся, заблудших на стезю правды наставляяй.

Радуйся, на путь спасения нас проводяй.

Радуйся, кротости и воздержания учителю.

Радуйся, всем и везде скорый предстателю.

Радуйся, яко печаль нашу в радость претворяеши.

Радуйся, яко присно с нами пребываеши.

Радуйся, Николае, Святителю великий, Зарайский Чудотворче.

Кондак 3

Силою свыше укрепи нас, пастырю добрый, немощных и убогих, все упование на тя возложших и помощи от тебе получити чающих и как некогда являлся еси Евстафию своею благодатию осиявая его, тако и к нам снизойди, покрывающя нас своим святительским омофором, ограждая от всяких зол и напастей от всюду находящия на нас, да твоим милосердием всегда храними прилежно Господу зовем: Аллилуиа.

Икос 3

Имуще праведный гнев, Николае, на пресвитера, коснящу исполнити повеленная, посла еси нань болезнь глазную и не видеша очи его ничесоже. Позна убо тогда наказание свое и нача скорбети и плакатися, глаголя: согреших пред тобою, отче, не послушах твоих повелений, прости мя непотребнаго, буди воля твоя, якоже рече ми. Милосердова же убо о нем, и в той час прозре очи его, и радостно взываху ти:

Радуйся, призывающим имя твое благодать подаваяй.

Радуйся, правосудное наказание на милость претворяяй.

Радуйся, страдальцев и безпомощных велия отрадо.

Радуйся, ненадежных и отчаянных известная надеждо.

Радуйся, вечных благ щедрый подателю.

Радуйся, недужным и болящим скорый врачу.

Радуйся, Божиею благодатию мертвецев воскрешающий.

Радуйся, хромыя и увечныя абие исцеляющий.

Радуйся, ослепших дивное прозрение.

Радуйся, верных надежное утверждение.

Радуйся, поможение во всякой беде.

Радуйся, елико восхощеши, вся возможна тебе.

Радуйся, Николае, Святителю великий, Зарайский Чудотворче.

Кондак 4

Бурею богопротивления дышуще, князь мира сего, иже искони человекоубийца есть, ежечасне души наша уловляет и от чертога райскаго далече гонит, и в пропасть темную греха ввергает. Но и оттуда вопием ти: помози нам, Угодниче Божий, услыши нас, ослепших душевными очима, во греховном плену сущих, сотвори над нами чудо - отверзи наша очи мысленныя, да зряще цепи смрадныя, имиже души и телеса наша сковани есте, возимеем твердое желание избавлены быти сего, вопиюще Богу: Аллилуиа.

Икос 4

Слыша и ведуще твое заступление о нас, прехвальне, молим тя, пастырю святый: изгони козлищя злыя, недостойне во святей ограде твоей пребывающия, якоже фарисеи добры и благи себе показующия, но выну беззаконие и неправду творящия. Овцы, иже глас твой слышат и по тебе грядут, собери в ню, соблюдающя их от греха и соблазна, всех приносящих тебе таковая:

Радуйся, нерушимый столпе веры и забрало.

Радуйся, добродетелей чистейшее зерцало.

Радуйся, свете утешения, мрак скорби разгоняющий,

Радуйся, к Богу нас хладных, любовию своею согревающий.

Радуйся, никтоже бо к тебе притекаяй посрамлен отходит.

Радуйся, сице ради, тя на веки превозносят.

Радуйся, от всякаго лютаго спасаяй обстояния.

Радуйся, падших грешник легкое востание.

Радуйся, отверзый нам двери милосердия.

Радуйся, имиже закрывый наша прегрешения.

Радуйся, помощниче и покровитель наш бысть нам во спасение.

Радуйся, яко славно бо прославися.

Радуйся, Николае, Святителю великий, Зарайский Чудотворче.

Кондак 5

Боготечней и путеводней звезде уподобися пречестная икона твоя, преблаженне Николае, чудне правяще путь пресвитеру. И прохождаста ему многи страны иноземныя, всюду честь от всех приимаху, ради чудес от иконы твоея бывшия. И такожде шествовав, прииде в Новгород Великий и видя токи чудес, источаемыя людем града того, пребысть Евстафий многие дни тамо. По днех же оных возстав, течаста дале, тщашася дойти нареченнаго места Рязанския земли, неустанно поя Богу: Аллилуиа.

Икос 5

Видеша благоверный княже Феодор во сне, тебе, Святителя и Чудотворца, повелевающа итти во сретение образа, удивистася и воспрянув от видения сего трепетен бысть и чудяшася глаголам сим емуже рек еси, но абие возсташа иде на место предреченное и прия от Евстафия чудотворный образ твой, егоже радостно лобзая с честию великою принесе во град свой. Сорадуясь сему и мы песнословим тя, святче, тако:

Радуйся, к Богу о нас прилежный молитвенниче.

Радуйся, жизни нашея мудрый наставниче.

Радуйся, лествице, души наша горе возносящая.

Радуйся, свече несгораемая, свече, огнем любви Божия горящая.

Радуйся, промышление усерднаго о людех приятелище.

Радуйся, чудесы твоими весь мир исполняющий.

Радуйся, светило великое всея вселенныя.

Радуйся, чад Матери Церкви Божие благословение.

Радуйся, яко мир весь приносит тебе песни хваления.

Радуйся, яко все бо упование наше на тя возлагаем.

Радуйся, твоим бо предстательством спастися уповаем.

Радуйся, твоим бо ходатайством в двери райския внити чаем.

Радуйся, Николае, Святителю великий, Зарайский Чудотворче.

***

Читайте также:

• Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
• Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедника и ревнителя веры православныя воздвиг тя Господь, великий Николае, в тяжкое и смутное время, егда ереси и расколы раздирали Святую Церковь Христову, и ныне паки возстани, о преизрядный защитниче христиан, карающа посрами и обличи безумныя враги, паки вражду и раздор в Церковь Божию несущих и не хотящих Спасителю - Истинному Богу воспевати: Аллилуиа.

Икос 6

Возсиял еси, Николае, светом невещественным сияюща яко столп превеликий, иже из камени добродетелей сложенный и путь заповедей Христа всем указующий во тьме грехов и неверия блудящим. Сице ради зовем ти:

Радуйся, Всемогущаго Творца известный умилостивителю.

Радуйся, еще при жизни удостоивыйся Господа и Матерь Его видети.

Радуйся, яко ныне предстояще пред Божиим Престолом, помяни нас во Царствии святых.

Радуйся, яко нищих духом небесное упокоение.

Радуйся, по Боге плачущих, безконечное веселие,

Радуйся, образе кротости, иже тобою землю блаженства наследят.

Радуйся, алчущих и жаждущих правды - сладостная трапезо.

Радуйся, яко милостивый Николае, всеми именуемый.

Радуйся, чистотою сердца своего выну зриши Царя славы.

Радуйся, миротворче святый, Отца небеснаго верный сыне.

Радуйся, поношение и гонение за Христа, вся до конца претерпевый.

Радуйся, и веселием, яко мзда твоя многа на небесех.

Радуйся, Николае, Святителю великий, Зарайский Чудотворче.

Кондак 7

Хотяй нам спастися и вечныя славы причастники быти, милосердне Николае, ты еси выну молиши Христа Бога тебе призывающих, Его же умоли о нас, кроме греха ничто же имущих, оставити вся наша, и венцев небесных сподобитися, якоже о князе Феодоре и ближних его умолил еси, тако и нас сотвори, вкупе со сродники наша, вселитися в чертозех Отца Небеснаго, идеже обитаеши еси. Бога же, даровавшаго нам ходатая таковаго, вечно восхваляти будем: Аллилуиа.

Икос 7

Новую песнь воспеваем ти, священноначальниче Николае, и яко дар многоценный, тебе ю приносим, вемы бо, яко капля сия славословия ничтоже есть в великом море хваления чудес твоих, ихже обильно изливаеши всем, верою и любовию тебе зовущих:

Радуйся, радосте наша в скорби всем сущим.

Радуйся, по коегожде потребе всем подающий.

Радуйся, желаний благих скорый исполнителю.

Радуйся, молящихся ти богомудраго жития устроителю.

Радуйся, поучающий нас, яко прелесть мира сего, яко дым исчезает.

Радуйся, умудряющий нас, яко житейское попечение, яко прах, иже ветр разметает.

Радуйся, от мирския суеты невидимо нас присно ограждаеши.

Радуйся, непоколебимое упование наше в жизни сей и по смерти.

Радуйся, яко мы, грешнии, твоим заступлением сохраняемся.

Радуйся, от многия погибели спасший.

Радуйся, от нечаянныя смерти верны люди хранящий.

Радуйся, живота мирен конец чтущим тя даруеши.

Радуйся, Николае, Святителю великий, Зарайский Чудотворче.

Кондак 8

Странное и непостижимое чудо является пречестный образ твой, Николае, уподобися бо звезде пресветлей, животворны лучи всем испущающей и к жизни небесней пробуждающей, во греховнем мраке ночи спящих. Да возсияет и нам грешным златозарный луч надежды всепрощения от иконы твоея, ю же и в час сей зрим зде пред собою, умильно поюще: Аллилуиа.

Икос 8

Всея земли Русския явися, яко непобедимый воеводо и защитниче, ты еси, Николае, егда Богу, попустившу за грехи наша прииде безбожный царь Батый, разоряющу грады и села, убивающи безвинныя чада и жен, огню все предающа. Не остави убо нас, милостиве, малодушных раб твоих. Ниспосли от славы Вышняго - земли нашей благодатный и желанный мир, да спасаемии тобою, зовем ти:

Радуйся, страны нашея надежный хранителю.

Радуйся, от нашествия иноплеменных избавителю.

Радуйся, аще бранный день прииде, врага одолети нам помогаяй.

Радуйся, от постыднаго плена нас свобождаяй.

Радуйся, на поле брани воинов зорко хранящий.

Радуйся, за други своя живот положивших к небу возводящий.

Радуйся, скорбь родителей о погибших чадех утешающий.

Радуйся, щите, неповинныя от смерти спасающий.

Радуйся, броней и крепостью полки наша облекающий.

Радуйся, прославляющих тя пред всеми прославивый.

Радуйся, русскими людми наипаче возлюбленный.

Радуйся, имиже наипаче усердно почитаемый.

Радуйся, Николае, Святителю великий, Зарайский Чудотворче.

Кондак 9

Всякое слово твое непреложно бо есть, богоносе Николае, сбыстся и глагол твой предреченный князю, егоже зле уби безбожный царь Батый, егда венцем небесным увенчан бысть от Бога, яко живот свой положи за други своя. Княгиня благоверная горести великия исполняся и не хотяше безчестия прияти от нечестиваго царя, рече тебе: приими мя, отче Николае! И паде с храмины высокой с возлюбленным чадом своим Иоанном и заразися даже до смерти, ныне же во Царствии Небеснем троица сия сладостно зряща тя, поет Богу: Аллилуиа.

Икос 9

Витии мира сего безбожны и сладкоречивы, льстивно слух услаждающия грешных и беззаконных человек, сластолюбивую похоть нашу превозносяща, наслаждатися токмо в жизни сей поучают, глаголя бо: "Несть жизни будущаго века" и души верных соблазняющя, и от тебе, всехвальнаго Чудотворца, слух и сердце наша отвращают. О, заступи нас, Угодниче Божий, от сих нечестивых человек, услыши нас, взывающих тебе сице:

Радуйся, в тяжких бедах и напастех нас укрепляяй.

Радуйся, днем и нощию помощь верным подаваяй.

Радуйся, молитв твоих ради, яко миром благоухания, злосмрадие греха от нас отгоняеши.

Радуйся, яко на раны беззаконий наших елей милости возливаеши.

Радуйся, тихое пристанище в бурех земнаго треволнения.

Радуйся, плавающих в пучине житейскаго моря кораблю спасения.

Радуйся, вразумляющий нас, яко сладость греха горечь вечную нам уготовляет,

Радуйся, яко роса молитв твоих пламень страстей наших угашает.

Радуйся, грехами нас, мертвых, оживляющий.

Радуйся, окаменение сердечное умягчающий.

Радуйся, гордых низложение, смиренных же прославление,

Радуйся, труждающихся неизменно покой и отдохновение.

Радуйся, Николае, Святителю великий, Зарайский Чудотворче.

Кондак 10

Спасти хотя многоцелебный образ твой от новаго нашествия агарянскаяго, егоже во град Коломну принесоша священницы зарайския, идеже цельбы и знамения подавал еси обильно, всем православно исповедующим Единаго Бога Отца и Единаго Господа нашего Иисуса Христа и Единаго Бога Духа Святаго - Троицу Единосущную и Нераздельную, Ея же безпрестанне вся Силы Небесныя славят: "Святый Боже, Святый Крепкий, Святый Безсмертный", с ними же помилуй нас и мы припевающе поем: Аллилуиа.

Икос 10

Стена несокрушима был еси и есть, Николае, великия страны нашия и граду тобою возлюбленному, идеже неотступно пребываеши честным образом твоим, имже никем носимый прейде от Коломны и паки обретеся в Зарайске, от него же список пречестней иконы твоея бывшим тамо, иже никем носимый прейде на Коломну. Приидите вси вернии, да спасение наше премудро устрояющему купно тако воспоем:

Радуйся, всяк бо образ твой чудотворен есть, с верою к нему притекающим.

Радуйся, вкушением временней горечи скорбей вечную сладость верным уготовляеши.

Радуйся, яко во тьме печалей наших, светом упования на тя озаряеши.

Радуйся, в страданиях наших терпение нам подающий.

Радуйся, ко престолу славы Господния нас ведущий.

Радуйся, супругом и домом благочестивым Божие благословение.

Радуйся, во узах и темницах сущих, благодатное посещение.

Радуйся, чудес быстротечная многоводная реко.

Радуйся, избранного града Зарайска утверждение и красото.

Радуйся, граду сему особое благоволение явивый.

Радуйся, егоже от разорения Батыя чудесно сохранивый.

Радуйся, место сие чудесы твоими освятивый.

Радуйся, Николае, Святителю великий, Зарайский Чудотворче.

Кондак 11

Поют вси роди дивныя чудеса твоя, преславне Николае, от иконы твоея бывшия, ей же явися завистник, враг рода человеча диавол, устрели бо сердце некоего Ковача и вложи ему мысль скрасти церковь, в ней же образ твой чудотворный стояху; и пришед нощию одра весь приклад с него, не убояшася и Бога Всезрящего, Его же со страхом и трепетом всяко дыхание хвалит: Аллилуиа.

Икос 11

Светозарней и живописней иконы своея не потерпе поругания, открыл еси, отче, людем тайное злодеяние Ковача, к нему же со епископом множество народа течаху и егда узре их тать, иже не вопрошен еще отда приклад, горько плача о гресе своем; возрадоваша вси званими сими тя почитая:

Радуйся, греховных язв безмездный целителю.

Радуйся, предерзостных грозный наказателю.

Радуйся, хитросплетения вражия, яко паутину расторгающий.

Радуйся, силою Христовою морем и огнем повелевающий.

Радуйся, огненный мечу, его же демони трепещут.

Радуйся, отражение вражиих стрел, их же беси в нас мещут.

Радуйся, из пучины греховныя нас извлекающий.

Радуйся, на стезю покаяния премудро нас наставляющий.

Радуйся, яко ходатая пред Богом за нас грешных имамы.

Радуйся, в день печали и горя слышание быстрое.

Радуйся, милосердия и щедрот отче достохвальный.

Радуйся, не токмо христианы, но иноверцы почитаемый.

Радуйся, Николае, Святителю великий, Зарайский Чудотворче.

Кондак 12

Благодатию, данной ти от Бога, заступниче усердный, спаси нас всех, ко твоему покрову прибегающих и заступления твоего ищущих, его же получити, твердо надежду имущих. Сего ради безжизненныя и хладныя сердца наши оживи, огнь любве в них возжигающя, дабы свет сей благодатный всем светил. Пустующия же души наша елеем добрых дел наполни, да вси неверныя зряще сие о нас сущая уразумеют, яко воистину не токмо с нами Бог, но и мы с Богом, Его же славим: Аллилуиа.

Икос 12

Поюще возвеличим православные людие заступника и Чудотворца, Святителя Христова Николая, яко звезды небесными чудесы своими всю страну нашу осиявшаго, приносящя песни и величания сицевая:

Радуйся, от века Богом предизбранный.

Радуйся, еще до рождества своего Ему же посвященный.

Радуйся, благодатию Святаго Духа осиянный.

Радуйся, яко с младенческих пелен Троицу прослави.

Радуйся, от юности твоея ближняя всем сердцем возлюбивый.

Радуйся, яко был слугою всех человек - друже Ангелов явися.

Радуйся, непоколебимый адаманте веры, ею же души наша просвещающий.

Радуйся, крепкий якорю надежды, чаянием вечных благ нас оживляющий.

Радуйся, благоухающее миро любве, сердца наша сим благоуханием исполняющий.

Радуйся, неистощимую бо сокровищницу чудес в теле мы, грешнии, обретше.

Радуйся, чистый ключу, ко единому Источнику жизни притекший.

Радуйся, дивный отче, вечныя памяти достойный.

Радуйся, Николае, Святителю великий, Зарайский Чудотворче.

Кондак 13

О великий и всеизряднейший Угодниче Христов Николае, прими нынешнее сие малое моление, от сердец наших тебе приносимое, и сохраняющя от всякия скорби, нужды и болезни, умоли о нас Владыку Вседержителя, да избавимся вечныя муки и внидем в радость Господа своего, воспевая дивному во святых Богу нашему: Аллилуиа, Аллилуиа, Аллилуиа.

Сей Кондак читается трижды, затем Икос 1 и Кондак 1.

Молитва святителю Николаю Зарайскому

О святый и прехвальный пастырю наш Николае, отче преблаженный, заступниче преславный, в милостех великий Чудотворче, призри с высоты небесныя на нас, потемненных грехми, паки ныне припадающих к тебе и молящих тя: просвети души и сердца наша светом славы твоея, согревающя их лучами Божия благодати.

Воззри милостивым твоим оком на нас, милости твоея недостойныя. И якоже древле благоволил еси отцем нашим, имже исцеления неоскудно источал еси от сея иконы твоея, тако и ныне посети нас милостию твоею, пролей многоводную реку благодеяний всем, с верою притекающим к сему неистощимому источнику чудес - ко пречестному образу твоему; пред нимже преклонша колена смиренно молим тя:о великий и предивный Чудотворче - всем всяк ты был еси, но и не только был еси, но и ныне есть и во веки будеши - правилом веры, образом кротости, воздержания Учителю, добродетелей светильниче, скорбящих - утешителю, бедных и несчастных - нетленное богатство и вечное счастье, недужных и болящих - безмездный целителю и скорый врачу, плавающих и путешествующих - надежный кормчий и путеводителю, сирот и вдовиц - милостивый питателю, невинных младенец - Ангел Хранителю, юных чад - добрый наставниче, старосте безпомощне - помоще и сило, обуреваемых - пристанище, заблудших - исправление и о всех грешных теплый ходатай и предстателю пред Богом.

Всем еси во всякой нужде пособствуеши и все на пользу и добро нам выну устрояеши. О, кий язык возможе по достоянию прославити величие чудес твоих, ими же весь мир преисполнил еси! Како и киими словесы благодарения восхвалим тя, теплый наш молитвенниче! - не вемы бо, но приими сию нашу молитву и славословие, тебе возносимыя, яко ничтожнейший залог благодарения от неблагодарных рабов твоих. Не разумеем бо твоих славных деяний о нас сущих - ты бо сам восхоте утешение велие нам послати - чудотворный образ свой, егоже изволили еси пренесену быти издалеча во град сей, прославляющя, не токмо сие место избранное тобою, но и свю страну нашу, юже огради и спаси от нашествия иноплеменник и междоусобныя брани, от труса, потопа, огня и глада и от всякаго зла, действующя по наущению диаволю. Ниспошли нам мир и тишину, благорастворение воздухов, земли плодоносие и всем людем твоим подаждь благоденствие, здравие телесное и душ спасение и во всех добрых начинаниях их благое поспешение.

Вемы бо, яко много может молитва твоя пред Господем нашим, и сего ради припадающе вопием ти: услыши нас, заступниче преславный, виждь слезы и воздыхание, не отрини нас грешных, уповающих на неизреченное милосердие твое, силою свыше укроти, богомудре, жизни нашея бурное море егоже горькия волны несчастий и бед потопляют бо нас, туманный мрак искушений и соблазнов окутывают всю душу и сердце наше, егоже глубина великая - сия суть страшная бездна грехов и беззаконий наших, в нюже впадаем на всяк день и час, творя неправды во всех путех своих.

Умилосердися над нами, Угодниче святый, подаждь нам погибающим руку спасения, исторгающя из страшной пучины моря сего; тебе бо благодатию Христовою повинуются и море, и воздух, тебе стихии земныя слушают, тебе и злыя силы трепещут, избави же от вечныя погибели души наша, их же тебе вручая, молим тя: буди нам, заблудшим овцам - пастырю добрый, храняща нас от ловления, паче же от растерзания страшнаго льва - губителя душ человеческих - диавола, иже рыкаяй ходит, иский кого поглотити, сам буди нам Ангел-наставник, спасая нас от всякия нужды и печали.

Умоли о нас Человеколюбца Бога, да подаст нам прощение и оставление грехов и прегрешений наших, а по кончине живота нашего сподобитися радостнаго слышания сладчайшаго гласа Господа нашего Иисуса Христа: "Приидите, благословеннии Отца Моего, наследуйте уготованное вам Царствие от сложения мира. Возрадуетеся и возвеселитеся днесь и присно, и во веки веков. Аминь".

Тропарь святителю Николаю Зарайскому

Пресветлый храме Святаго Духа, Богомудре отче Николае, благодатию небес освяти души наша, заступи и покрый всечестным твоим омофором, его же приял еси от рук Пречистыя Девы, и просвети нас светом заповедей Христа, от Него бо приял еси глаголы жизни. Моли благость Отца Небеснаго, во еже спастися православно чтущим тя, даруя нам велию милость.

Кондак святителю Николаю Зарайскому, глас 6

Дивнаго в чудесех чудотворца воспоем, вси людие, празднующе новаго источника щедрот явление, издалече к нам притекшаго, великаго святителя хотением: припадающе к нему верою, напояем жаждущия души своя, любовию зовуще: о преславный Николае, пастырю наш добрый, помози нам, немощным и убогим, в житий сем многотрудном и вечныя жизни наследники нас сотвори.

Величание

Величаем тя, святителю отче Николае, и чтем святую память твою: ты бо молиши за нас Христа Бога нашего.

Читать другие акафисты раздела "Православные акафисты"