Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист новомученикам и исповедникам Черкасским


Православные акафисты

Акафист новомученикам и исповедникам Черкасским

Кондак 1

Возбранное Христово воинство, от Черкасския земли возсиявшее, воспоем, людие. Онех бо ко Господу молитвами от злых избавитися чаем. И сих множеству благодарственная восписуем пение:

Радуйтеся, новомученицы Черкастии, присные о нас пред Богом молитвенницы.

Икос 1

Ангельским ликом новии сопричастницы явистеся святии новомученицы и в сих совокупленнем множестве пред Господем нашим, молимся вам прилежно: за ны предстателие будете, да зовем вам:

Радуйтеся, за Христа на смерть осужденныя.

Радуйтеся, многия ко Христу приведшия.

Радуйтеся, всех наставницы к покаянию.

Радуйтеся, молящиися о мире нашея державы.

Радуйтеся, в темницех грешным бывшии светильницы.

Радуйтеся, Феодоре, Димитрие, Мефодие и Харитоне, славнии диаконы Черкасстии.

Радуйтеся, Мелетие, Иоанне, Федоре, Каллисте, Умани монашеское удобрение.

Радуйтеся, Симоне, Феодоре и Иоанне сынове Церкви, пресвитерства саном почтенныя.

Радуйтеся, новомученицы Черкастии, присные о нас пред Богом молитвенницы.

Кондак 2

Видяше козни безбожных, иерей Иоанн вкупе со старостою церковным Димитрием и мирянами благочестивыми Иаковом и Иоанном, Кириллом и Владимиром и иными православными не попустиша ветхую церковь разграбити, сами нощи сущей тую по частям пренесши, воспеша Богу: Аллилуйя.

Икос 2

Разум Божий имуще противосташа оглаголющим их от Коробовки иерей Иоанн со чадами духовными своими и суд неправедный приемше о Господе почиша. Таковых кончину ублажающе зовем таковая:

Радуйтеся, пастырям Христовым образ дерзновения показавшия.

Радуйтеся, преподобномученику Макарию кончиною подобныя.

Радуйтеся, священномученицы, сана своего не отрекшиися.

Радуйтеся, преподобномученицы, ангельским чином совокупленныя.

Радуйтеся, Радость вашу Богородицу в Небесных узревшии.

Радуйтеся, Иоанне и Александре, пастырие неодолимыя страхом.

Радуйтеся, святии Городища иереи Василие, Александре и Иоанне.

Радуйтеся, новомученицы Черкастии, присные о нас пред Богом молитвенницы.

Кондак 3

Силою Вышняго укреплен быв священноинок Киприан от обители святаго Онуфрия во веси Залевках народ Божий упасаше. Ему же внемлюще, святый Стефан храму обновление сотвори. И крепляшеся Слово Божие, на яже злочестивыя ополчившися, яша святыя на муки, поющих: Аллилуйя.

Икос 3

Имуще помышление от суеты мирския отрещися, святый Киприан притече во обитель Свято-Онуфриевскую, обаче нечестивых ради, иже монастырь сей упраздниша, паки в мир иде, не приобщився ему, паче же кровию себе за Христа излиянную очисти и в Чертог Небесный со иными вниде, имже вопием:

Радуйтеся, прещений безбожных не убоявшиися.

Радуйтеся, кровьми вашими спасение себе стяжавшии.

Радуйтеся, Покров Богоматери молитвами на ся призвавшии.

Радуйтеся, Ангелом Хранителем вашим радость сотворившии.

Радуйтеся, Маркеле, Леониде и Феодосие, смелянския люди упасавшии.

Радуйтеся, Корсуньския преподобномученицы Владимире с Неофитом.

Радуйтеся, песнопевцы Троицы Иосифе, Афанасие и Феодоте.

Радуйтеся, Симеоне и Антоние, последователями святителя Тихона себе именовашии.

Радуйтеся, новомученицы Черкастии, присные о нас пред Богом молитвенницы.

Кондак 4

Буря гонений паки лукавым на Церковь воздвиженная, не отврати люди Божия от веры святыя. Иже яко древле апостоли в домех тайно на молитву собирашася, тако иерей Авраам молебень служивше от безбожных ят бысть. Обаче крест и Евангелие с нуждею едва возмогоша исторгнути злодеи от рук священника хрома суща. Сего крепости духовней дивящеся, речем Богу: Аллилуйя.

Икос 4

Слышавше новомученицы глас Спасов: "Иже отвержется Мене пред человеки, отвергуся его и Аз пред Отцем Моим иже на Небесех", не отвергостеся Христа, ни сана, ни страданий. Авраам же иерей дерзновенно за Евангелие и крест с мучители своими брався, не давая псом святыни, емуже с прочими поюще глаголем:

Радуйтеся, от Христа венцы стастотерпцев получившии.

Радуйтеся, мучеником древним подобницы.

Радуйтеся, древним святым на Небеси собеседницы.

Радуйтеся, пред лицем смерти лютыя не смутившиися.

Радуйтеся, дерзновение за ны молитися получившии.

Радуйтеся, иночества честное прозябение Зиноне, Феодоре и Тимофее.

Радуйтеся, черкасским людем Евангелия проповедницы Филиппе, Евгение и Иоанне.

Радуйтеся, земли Звенигородския иереи Антоние и Василие.

Радуйтеся, новомученицы Черкастии, присные о нас пред Богом молитвенницы.

Кондак 5

Боготечными звездами явистеся нам святии новомученицы Черкастии, вашим бо стопам последуя, Царствия Небеснаго достигнути чаем, аще токмо веру вашу и терпение стяжати потщимся, поюще Богу: Аллилуйя.

Икос 5

Видяще терпение ваше, святии, Господь дарова вам обители Небесныя, в нихже в день Обрезания Господня седминадесят муеченик внидоша с прочими Троицу восхваляюще. Сим же хвалебное пение приносим сицевое:

Радуйтеся, непрестанныя радости сподоблыпиися.

Радуйтеся, на Бога печали своя возлагавший.

Радуйтеся, аки на Голгофу крест носяще возшедшии.

Радуйтеся, тленных лишенная и вечными награжденнии.

Радуйтеся, от Золотоноши Михаиле, Григорие, Кирилле в десятице сияющий.

Радуйтеся Димитрие, Иоанне, Александре от Канева пред Богом предстоящий.

Радуйтеся, Уманския пресвитеры Петре, Георгие и Автономе.

Радуйтеся, со Шполянским преподобномучеником Софронием, Антоний от Чигирина и Фаддей монашеская славо.

Радуйтеся, новомученицы Черкастии, присные о нас пред Богом молитвенницы.

***

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедниками терпения и за Христа страдания в новая времена безбожныя явишася святых новомученик в земли Черкастей собори. В нихже найстарейший протоиерей Михаил старец сый сединами и житием нескверным. Иже яко благая тако и злая в юдоли сей прием, поя Богу: Аллилуйя.

Икос 6

Возсияли аки звезды пресветлии во мраце неба нощнаго, новомученицы славнии, и сиянием вашея славы, юже вам Христос воздаде, землю Черкасскую осветисте, да от грех своих избывше покаянием воспоем благодаряще Бога таковая:

Радуйтеся, крест Христов безропотно пронесшии.

Радуйтеся, от земли прославление приемшии.

Радуйтеся, Фаворским светом ныне облеченнии.

Радуйтеся, неизреченных в Царствии Божием зрителие.

Радуйтеся, крепостию веры адаманту подобныя.

Радуйтеся, Всеволоде, Вонифатие, Феофане, людий Канева молитвами хранителие.

Радуйтеся, Симоне и Самуиле в своих чинех Богу служившии.

Радуйтеся, Савво и Иулие, Божии диаконы.

Радуйтеся, новомученицы Черкастии, присные о нас пред Богом молитвенницы.

Кондак 7

Хотяще сохранити сосуды церковныя от расхищения оных новыми валтасарами, служитель Божий Сергий спрята я. Егда же от Шполы во Черкассы выслан бысть, сими тайно Евхаристию совершаше, якоже и множество собратий иже в лице новомученик сияют, поющих Богу: Аллилуйя.

Икос 7

Новыя жизни явистеся причастницы, приявше смерть от рук безбожных мучителей святии новомученицы, темже вас прославляюще, Укрепившаго вы на подвиг прославляем, зовуще страстотерпцем таковая:

Радуйтеся, Церкве Православныя камения драгоценныя.

Радуйтеся, апостольских преданий хранителие.

Радуйтеся, безбожных расколов обличителие.

Радуйтеся, тернистый путь, ко Господу избравшия.

Радуйтеся, в пристанище вашего хотения приплывшии.

Радуйтеся, Паисие и Пионие, риз монашеских не отринувшии.

Радуйтеся, преподобномученицы Кассиане и Ипполите, обители Печерския рождение.

Радуйтеся, Валентине и Михаиле, не земнаго, но небеснаго стяжателие.

Радуйтеся, новомученицы Черкастии, присные о нас пред Богом молитвенницы.

Кондак 8

Странниками в земли Черкастей и во юдоли сей быша многая новомученицы, ихже ныне прославляем страдания. Тако иерей Михаил от земли ляхов во град Корсунь вселися, идеже ят бысть вкупе с собратиями Александром и Иоанном. И крестный путь прошедша, в небесных ныне купно вопиют: Аллилуйя.

Икос 8

Весь Духом Божиим объят бысть иерей Михаил от Корсуньских придел, обличая власть безбожную, яже немилосердно выя людския даньми и уроки обложи, за нихже оружия зиждут, да ним на Церковь Божию брань вести будут. И многая другая, за яже нечестивыя смерти предати порешиша, онаго егоже в прочих на честней иконе зряще, купно воспеваем:

Радуйтеся, Христово смирение стяжавшии.

Радуйтеся, Павлово дерзновение пред судищем неправедным имевшии.

Радуйтеся, градов и весей земли Черкасския украшение.

Радуйтеся, яко со святыми ваше упокоение.

Радуйтеся, Григорие и Леонтие, святых обителей возжелавшии.

Радуйтеся, Луко и Харлампие, мзду верных служитель приявшии.

Радуйтеся, Ипполите и Феодоре, вся мысли к Богу обращавшии.

Радуйтеся, Михаиле и Тихоне, людем путь спасения возвещавшии.

Радуйтеся, новомученицы Черкастии, присные о нас пред Богом молитвенницы.

Кондак 9

Всяк сад егоже не насади Отец Мой Небесный, искоренится - Господь рек учеником Своим. Сия словеса о власти безбожней от ныне ублажаемых нами проповедаются во уши православных. Аще и не скоро, обаче сбыстася чаяние их и Церковь чад своих прослави, поюще Богу: Аллилуйя.

Икос 9

Витий, многовещанных словеса, сказати не довлеют ни терпение, ни славу вашу, угодницы святии. Но родом неблагодарным и непамятливым да не явимся пред Богом, зовем вам, новомученицы, похвальныя глаголы таковыя:

Радуйтеся, гордыню бесовскую страданьми своими низложившии.

Радуйтеся, иноком образ злострадания явившии.

Радуйтеся, миряном благочестивым светильницы на возвышении горящии.

Радуйтеся, пред Господем о нас неустанно молящиися.

Радуйтеся, иерейскаго чина украшение Аврааме, Кирилле и Василие.

Радуйтеся, Симеоне и Викторе, крепости непобедительныя исполеннии.

Радуйтеся, Сергие и Варнаво, пути легкаго не искавшии.

Радуйтеся, преподобномученицы достохвальнии и в них Иаков послушания рачитель.

Радуйтеся, новомученицы Черкастии, присные о нас пред Богом молитвенницы.

Кондак 10

Спасти хотя люди от сетей диавольских, безбожными в стране нашей распростренных, святии дерзновенно на стогнах и торжищах призываху всех на покаяние, провозвещающе, яко за отступничество Бог нашлет супостаты со браниею велиею, в ней же погибнут не ведущие пети: Аллилуйя.

Икос 10

Стена крепка от прещений слуг антихриста бысть вера Православная новомученикам Черкасским. Сея чада исповедания Христова ни мук прещении, ни смертию не отвратишася, имже ныне воспоим:

Радуйтеся, страданиями души своя очистившии.

Радуйтеся, кровию своею погибель безбожным ускорившии.

Радуйтеся, нам спасения вечнаго желающии.

Радуйтеся, молитвами святыми вашими нас укрепляющии.

Радуйтеся, Господню славу ныне совершающии.

Радуйтеся, Диомиде, Никито и Стахие преславнии.

Радуйтеся, Никоне, Георгие и Дамиане, лик ангельских купностоятелие.

Радуйтеся, новомученицы Черкастии, присные о нас пред Богом молитвенницы.

Кондак 11

Пение сие мучеником приносимое да будет Господеви приятно, сих прославившему, славою Своею и Отчею и Духом Святым укреплявшему напревышше ума терпение. Сим же утвердився от Цибулева иерей Михаил рек: смерть не страшна аще приемлется достойно. Достойно же не токмо сей, но и иныя прияша, яже с ним поют Богу: Аллилуйя.

Икос 11

Свет Христова Евангелия в души восприемше Троицы быша проповедницы от веси Шабастовки иерей Владимир со диаконом Саввою и иеромонахом Паисием. Сию же троицу мученик во един день смерти безбожныя предаша, обаче жизни вечныя сих достойных сотвориша, имже сочисленным со инеми гласы поем хвалебными:

Радуйтеся, в чистоте Богу предстоящии.

Радуйтеся, расколоучителей басням не внявшии.

Радуйтеся, трием отроком от пещи вавилонския подобницы упованием.

Радуйтеся, не внявшии безбожных страхованиям.

Радуйтеся, блистанием вечныя славы освещеннии.

Радуйтеся, Лысянския земли троице Андрее, Михаиле и Иакове.

Радуйтеся, честныя архимандриты Петре и Палладие.

Радуйтеся, Корсуньския священноисповедницы Иоанне, Михаиле и Александре.

Радуйтеся, новомученицы Черкастии, присные о нас пред Богом молитвенницы.

Кондак 12

Благодать дати изрядную, восхотев Господь Своим служителям, попусти нечестивей власти избити оныя священики и диаконы, монахи и миряне, ихже на честней иконе ныне зрим, да сих прославляюще поем Богу: Аллилуйя.

Икос 12

Поюще Рождество Христово, внидоша во узилище святый Иоанн священник Чигиринский, собрат его Черкасский иерей Симеон с диаконы Димирием и Феодором, иже в навечерие праздника сего яты быша. Сих же и прочих сонм страдалец прославим песньми таковыми:

Радуйтеся, аки звезды новыя Церкви нашей возсиявшии.

Радуйтеся, имя Христово на себе достойно именовавшии.

Радуйтеся, иго Христово доблестно понесшии.

Радуйтеся, Троицы верныя служители.

Радуйтеся, мученическим ликом купножители.

Радуйтеся, Тального пастырие славнии Стефане и Иоанне.

Радуйтеся, Катеринополя двоице славная Трофиме с Григорием.

Радуйтеся, Монастырища троице священная Владимире, Карпо и Михаиле.

Радуйтеся, новомученицы Черкастии присные о нас пред Богом молитвенницы.

Кондак 13

О, всеблаженнии новомученицы земли Черкасския, за веру Православную и имя Христово убиенныя. Почитающе ваша страдания прославляем Давшаго вам крепость, Егоже молите поставити нас в день судный идеже ныне сами пребываете, да выну поем Богу: Аллилуйя.

Сей Кондак читается трижды, затем Икос 1 и Кондак 1.

Молитва новомученикам и исповедникам Черкасским

О, всеблаженнии святий мученицы и страстотерпцы Черркастии, страданьми своими нашу православную землю уосвятившия и телеса своя безропотно мучениям от безбожник предавшия, душами же своими, венцами Божественныя славы увенчанныя, Престолу Божия предстоящия и непрестанно о ней молящийся. Се ныне, в день вашего прославления, дерзаем приносити вам сие хвалебноблагодарственное моление от нас, недостойных и грешных братии ваших, преклоняющих колена своего сердца перед высотой неизреченныя славы вашея, юже стяжали есте своим праведным и мученическим житием. Величаем ваша подвиги, светозарнии воины Христовы, терпением и мужеством кровавые терзания от своих мучителей до конца претерпевшия, врага же спасения нашего посрамившия и тем в нас пламень веры и любве Божия возжигаюшия. Ублажаем многострадальное житие ваше, иже уподобилося великим страстотерпцам земным, за правую веру Христову бесстрашно в руки мучитель предавшия и даже до смерти исповедовавшия ю. Восхваляем вас, святий новомученики, иже сподобилися есте примножити сонм святых небожителей и стяжати венцы достойни, егда по слову Спасителя гнали и поносили вас, и рекли всяк зол глагол на вы лжуще Христа ради, и судили судом неправедным. Вы же, волею своею крестную смерть достойно приявшия, льстивых словес отвратившися и мучитель злобных не устрашившися, кровию своею безвинною обильно оросили землю Черкасскую. Лобызаем со слезами язвы неизреченных страданий ваших, ихже в заточениях от новоявленых гонитель Христовых претерпели есте. Припадаем к вам, небесные предстоятелие наша и из глубины сердца вопием: святий мученицы Черкастии. Укрепите нас своим небесным ходатайством в мужественном стоянии даже до крови за святую веру и Церковь Православную, да ни скорбь, ни теснота, ни гонения, ни глад, ни нагота, ни меч не возмогут нас разлучити от любве Божия, яже о Христе Иисусе, нас ради крестныя муки и смерть Претерпевшаго. Призрите милостиво на нас с небеси, испросите от Человеколюбца Бога и Спаса нашего Иисуса Христа сохранит Церковь, юже основал еси на земли, от зловредных ересей, расколов и нестроений, и да оградит ю от всяких волков, во одежде овчей в стадо Христово войти хотящих. Посрамимте, яко посрамили есте слуг антихристовых и мучитель ваших, соблазны и искушения века сего лукавого, оградите нас от его прелестей, да отвергшеся себе и вземше на рамо крест свой, восследуем Христу и вашему богоугодному житию, распинающе плоть свою со страстьми и искушеньми и кознями, от диявола и слуг его исходящими. Помяните немощи и уничижения наша и своими святыми молитвами испросите у Бессмертнаго Христа Бога нашего, да и мы, земнороднии братия ваша, сподобимся безбедно и невредимо достигнути пристанища вечнаго спасения, и в блаженных обителях Горняго Отечества вкупе с вами и со всеми от века угодившими Ему водворимся благодатию и человеколюбием Господа нашего Иисуса Христа, Ему же подобает непрестанное славословие и поклонение со Безначальным Его Отцем и Пресвятым и Благим и Животворящим Духом всегда и в бесконечныя веки. Аминь.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru