Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист первый преподобным Кириллу и Марии Радонежским


Православные акафисты

Акафист первый преподобным Кириллу и Марии Радонежским

Кондак 1

Избраннии чудотворцы и предивнии угодницы Господни, Сергия великаго Церкви Российстей даровавшии, преподобнии Кирилле и Марие, обители Хотьковския заступницы! Пение похвальное вам приносяще, молим вы усердно: яко имущии дерзновение ко Господу, предстательством вашим от всяких бед нас свободите и наследники Царствия Небеснаго соделайте, да зовем вси радостно: Радуйтеся, преподобнии Кирилле и Марие, усерднии о нас пред Богом молитвенницы.

Икос 1

Ангели земнии и человецы небеснии воистину явистеся, преподобнии Кирилле и Марие, от юности вашея чистую совесть пред Богом имущии, и добре во благочестии вкупе пожившии. Мы же, таковое богоугодное житие ваше прославляюще, гласы хвалебными взываем сице:

Радуйтеся, от юности вашея Христа возлюбившии и Тому единому поработавшии.

Радуйтеся, целомудрия хранителие и душевныя и телесныя чистоты рачителие.

Радуйтеся, души и телеса ваша в обиталище Духа Святаго уготовившии.

Радуйтеся, исполненнии премудрости и разума Божественнаго.

Радуйтеся, яко от земли на небо преидосте и тамо со Ангелы Троице предстоите.

Радуйтеся, яко со безплотными лики Трисвятую песнь Ей воспеваете.

Радуйтеся, на небеси и на земли от Господа прославленнии.

Радуйтеся, обретшии место вечнаго всесветлаго упокоения.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 2

Видя Отец светов богоугодное житие ваше, благоволи избрати вас, блаженнии, да явите мирови светильник пресветлый – Сергия Преподобнаго, в немже и ваши имена прославляются и вси вернии воспевают Господу: Аллилуиа.

Икос 2

Разумом Божественым просвещеннии, Кирилле и Марие, непрестанно поучаста чада своя в послушании и кротости. Умудрите убо и нас, преподобнии, заповедем Господним следовати неложно, да обрящем, якоже и вы, спасение вечное и принесем вам благохваления таковая:

Радуйтеся, блаженнии, в боголюбии пожившии и благоверие сохраншии.

Радуйтеся, милости и сострадания преисполненнии.

Радуйтеся, милостынею и молитвами Небесное Царствие стяжавшии.

Радуйтеся, смирением и пощением вечное блаженство улучившии.

Радуйтеся, яко мзда ваша многа на Небесех есть.

Радуйтеся, яко молитвами вашими и мы надежды Царствия Христова не лишаемся.

Радуйтеся, яко радость ваша вечна во светлостех святых.

Радуйтеся, яко тояжде радости вашим предстательством и мы сподобляемся.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 3

Силою Божиею ограждаемь, преподобный Кирилл князю Ростовскому со всяким усердием служа, вкупе с ним во орду агарянскую, мира ради, хождаше, да люди Российстии ослабу от ига нечестивых имут и Богу непрестанно поют: Аллилуия.

Икос 3

Имуще помышление и удивльшеся молящиися в церкве людие о трикратном во чреве Мариином плода глашении, разумеша нечто преславное и чудное быти: и по сих уведевше радостное сына рождение, радовахуся. С ними же и мы радостная вам, преподобнии, приносим глаголюще:

Радуйтеся, двоице святая, Богом благословенная.

Радуйтеся, звезды пресветлии, богоугодный путь супружескаго жития верно указующии.

Радуйтеся, родителие блазии добраго и избраннаго плода.

Радуйтеся, благодати Божия исполненнии.

Радуйтеся, супругов в Православной вере и благочестии наставляющии.

Радуйтеся, богобоязненному воспитанию чад нас научающии.

Радуйтеся, целомудрия супружескаго образи преизящнии.

Радуйтеся, хотящих богоугодно жити изряднии учителие.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 4

Буря скорбей и напастей житейских не ослаби крепкия любве вашея к Богу, Кирилле и Марие, блаженнии, но паче научи вас изряднее отражати разженныя стрелы лукаваго. Научите убо и нас вся скорби мира сего с кротостию претерпевати, поюще Богу: Аллилуия.

Икос 4

Слышавше Варфоломея, грамоте неискусна, чтуща же богодохновенныя писмены, удивишася зело, блаженнии, благодарение Богу принесоша, премудрость отроку чрез Ангела даровавшему, егоже в дом свой, яко старца-схимника прияша, заповедь апостола Павла соблюдающе: страннолюбия не забывайте. Мы же, такову благодать Божию вам явленную ведяще, вопием сице:

Радуйтеся, заповедей Христовых вернии исполнителие.

Радуйтеся, учения Евангельскаго истиннии последователие.

Радуйтеся, угодницы и друзи Божии.

Радуйтеся, странноприимства древняго праотца Авраама подражателие.

Радуйтеся, светом благочестиваго жития вашего просиявшии.

Радуйтеся, любовь и милосердие к нищим и сирым явившии.

Радуйтеся, безпомощным скории помощницы.

Радуйтеся, яко и нам присно помогаете и к Небесному Отечеству руководствуете.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 5

Боготечным звездам подобни бысте, преблаженнии Кирилле и Марие, егда, пришедше от страны Ростовския в пределы княжества Московскаго, во граде Радонеже вселистеся и тамо сущих людей благочестием своим удивисте, подвизающе тех пети: Аллилуия.

Икос 5

Видевше, святии, тщание сына вашего Варфоломея к иноческому житию, моляху его, да пребудет с вами до кончины вашея. Он же, яко сын послушания, издетска наученный вами заповеди Господни исполняти, покорися воле вашей, якоже Божией, Кирилле и Марие, научая всех воспевати тако:

Радуйтеся, блаженств Христовых причастницы.

Радуйтеся, честнаго супружества и попечения о чадех истиннии образи.

Радуйтеся, ангелонравнии человецы.

Радуйтеся, преподобных и праведных сопричастницы.

Радуйтеся, Пресвятыя Троицы вернии служителие.

Радуйтеся, яко и чад ваших почитати Ю научившии.

Радуйтеся, яко сын ваш Триипостасному Божеству обитель дивную устрои.

Радуйтеся, яко сего ради и ваша святая имена прославлена суть по всей Руси.

Радуйтеся, преподобнии Кирилле и Марие, усерднии о нас пред Богом молитвенницы.

***

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедницы веры Православныя и ревнителие благочестия не словом токмо, но и житием вашим бысте во граде Радонеже, прехвальнии Кирилле и Марие. Темже и Святая Церковь достойно почитает вас, немолчно воспевая Дивному во святых своих Богу: Аллилуиа.

Икос 6

Возсия яко свет благочестивое в болярстве житие ваше, преблаженнии Кирилле и Марие, егда же достигше возраста преклонна, образ иноческий на ся восприяли есте во обители Хотьковстей, вышшее нам смирение показующе. Темже с любовию вопием вам таковая:

Радуйтеся, любве ради Господа славу мира сего оставльшии.

Радуйтеся, славу Божию возлюбившии.

Радуйтеся, во обитель древнюю пришедшии и тамо покой себе обретшии.

Радуйтеся, святую схиму в броню спасения восприявшии.

Радуйтеся, Покрову Богородицы душы своя вверившии.

Радуйтеся, образ Ангельский восприимшии.

Радуйтеся, всем иноком и инокинем доброе правило.

Радуйтеся, прежде кончины вашея блаженства от Бога удостоившиися.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 7

Хотя Человеколюбец Господь явити в житии вашем, преподобнии Кирилле и Марие, образ назидания, не токмо людем мирским, но и иноческому лику, внуши вам в старости маститей оставити всякое попечение земное и восприяти образ ангельский, яко венец нетления, во еже воспевати Триединому Богу Серафимскую песнь: Аллилуия.

Икос 7

Новую благодать показа всех Творец и Владыка чрез вас, преподобнии, егда прешли есте от временныя сея юдоли плачевныя во обители вечныя. Святыя бо мощи ваша, аще и под спудом сокровенны, чудеса источаху: многим болящим, наипаче же приносимым к вам младенцам исцеления подаваху. Сего ради приимите, врачеве наши блаженнии, от нас похвалы сицевыя:

Радуйтеся, смертию временною пришедшии к жизни вечней.

Радуйтеся, от Господа нетлением и чудесы прославленнии.

Радуйтеся, яко память ваша с похвалами и успение со святыми.

Радуйтеся, яко имена ваша написана на Небесех и благословенна во Отечестве вашем.

Радуйтеся, болящим младенцем исцеление подающии.

Радуйтеся, болящую девицу, с верою и любовию к вам притекшую, от недуга тяжкаго избавившии.

Радуйтеся, о любящих и чтущих вас небеснии предстателие.

Радуйтеся, от Господа дары благости Его нам присноподающии.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 8

Страшное и ужасное бедствие прииде на землю Московскую, егда язвою моровою уязвлены быша людие мнози во градех и весех и умроша. Тогда собор освященный со инокини Хотьковския обители молебная пения вам приношаху и предстательством вашим избавление от смертоносныя беды получиша, вопиюще благодеющему чрез вас Богу: Аллилуиа.

Икос 8

Вси боголюбцы скорбию велиею объяты быша, егда во дни гонений и лихолетий, на землю Российскую нашедших, обитель Покрова Пречистыя Девы в Хотькове разорению и запустению богоборцы предаша. Память же ваша, преподобнии, в благочестивых людех незабвена бысть и прославляема сице:

Радуйтеся, чудотворцы наши предивнии.

Радуйтеся, града Хотькова ограждение.

Радуйтеся, обители вашея хранителие.

Радуйтеся, земли Радонежския покровителие.

Радуйтеся, на враги видимыя и невидимыя крепцыи споборницы.

Радуйтеся, благодеяний множество источающии.

Радуйтеся, состраданием вашим всех объемлющии.

Радуйтеся, всем нам приснии ходатаи спасения.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 9

Вся Церковь Божия радовашеся, егда обитель ваша, преподобнии Кирилле и Марие, возсоздася и мощи ваша честныя, от лет древних Богом хранимыя, обретены и в храме соборнем положены быша. Сего ради людие к вам в напастех прибегают и помощь от вас получают, благодарне вопиюще Богу: Аллилуиа.

Икос 9

Витийство человеческое не довлеет к достойному прославлению чудес от мощей ваших и ныне совершающихся, преблаженнии Кирилле и Марие. Некая монахиня старица немощная, костное сокрушение имевшая и от врачей исцеление не обретшая, к вам, преподобнии, притекши, со слезами моляшеся. Здравие же получивши, во умилении сердца воспеваше вам:

Радуйтеся, благодати Святаго Духа сосуди избраннии.

Радуйтеся, радости нам вечныя благоприятнии ходатаи.

Радуйтеся, немощных от недугов скоро исцеляющии.

Радуйтеся, благодатными исцелении изрядных врачей удивляющии.

Радуйтеся, нетленнии благоухающии цветы.

Радуйтеся, к безсмертию указующии лучи.

Радуйтеся, на земли величием чудес блистающии.

Радуйтеся, на небеси со Ангелы Бога славящии.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 10

Спасение вечное наследовавше, богоблаженнии Кирилле и Марие, душами вашими во обителех горних неразлучно в Бозе пребываете, честными же мощами вашими во обители Пресвятыя Девы нетленно вкупе почиваете и обильная исцеления источаете, нас же в Горний Иерусалим оный руководствуете, вопиющих Богу: Аллилуиа.

Икос 10

Стена и прибежище вы есте, преподобнии, всем к вам притекающим, ихже вы от искушений и соблазнов мира сего сохраняете, во обители же вашей живущих монашескому деланию научаете. Сего ради вам сицевая благодарственная словеса приносим:

Радуйтеся, руководствующии нас ко спасению.

Радуйтеся, наставляющии шествовати по заповедем Господним.

Радуйтеся, научающии терпеливо нести крест свой.

Радуйтеся, яко вашими молитвами невредимы от бесов и человек злых пребываем.

Радуйтеся, яко вы есте ходатаи о святей обители вашей.

Радуйтеся, яко Богом собранным сестрам в ней вы есте помощницы.

Радуйтеся, чадолюбивии наши заступницы.

Радуйтеся, яко с преподобным Сергием престолу Божию предстоите.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 11

Пение молебное приносят вам, преблаженнии Кирилле и Марие, не во обители Хотьковстей токмо живущии, но и вси, чтущии сына вашего, преподобнаго Сергия. Прежде нежели поклонитися честным мощем его, по завету древнему, вам благодарение возносят: честь бо сына на родители преходит. Сего ради мы, прославляюще род праведных, поем Богу: Аллилуиа.

Икос 11

Светом трисиянным осияваеми, всеблаженнии Кирилле и Марие, со всеми святыми предстоите ныне Небесному Царю и яко светила светозарная, присно просвещаете души притекающих к раце мощей ваших. Сего ради, прославляюще вас, глаголем:

Радуйтеся, яко скончали есте жизнь свою телом, духом же не отступаете от нас.

Радуйтеся, с верою приходящих к раце мощей ваших благодатно освящающии.

Радуйтеся, бисери сияющии и благодатно люди просвещающии.

Радуйтеся, свети умнии, зарею Святаго Духа облистающии.

Радуйтеся, умилостивителие известнии Царя Небеснаго.

Радуйтеся, услышателие скории призывающих молитвенно честная имена ваша.

Радуйтеся, помощницы дивнии, упование на вас по Бозе возлагающих.

Радуйтеся, всем православным всякое прошение во их пользу исполняющии.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 12

Благодать от Бога вам данную ведяще, прилежно молим вы ныне, прехвальнии схимонаси: пролейте теплую о нас молитву ко Господу, да сохранит обитель вашу неврежденну от напастей и нестроений, и нас да помилует и спасет, вопиющих Ему: Аллилуиа.

Икос 12

Поюще ваше Богоугодное житие, преподобнии, и на небесех от Бога прославление, ублажаем праведное преставление ваше, величаем чудеса, от святых мощей ваших истекающая, и на неусыпныя молитвы ваша уповающе, взываем вам сицевая:

Радуйтеся, житие ваше земное благочестне скончавшии.

Радуйтеся, от Царя Небеснаго венцы славы приимшии.

Радуйтеся, облеченнии в ризу благодатнаго нетления.

Радуйтеся, во благоухании святыни нетленно почивающии.

Радуйтеся, препоясаннии силою многих чудес.

Радуйтеся, яко честныя мощи ваша врачебница явишася недугом человеческим.

Радуйтеся, яко от них всяк, с верою приходяй дары целебныя приемлет.

Радуйтеся, яко обитель ваша по всей земли Российстей прославляется.

Радуйтеся, преподобнии Кирилле и Марие, усерднии о нас пред Богом молитвенницы.

Кондак 13

О, преславнии чудотворцы и угодницы Господни, преподобнии Кирилле и Марие! Приимите сия моления наша от всея души вам ныне возносимая и сподобите нас предстательством вашим ангельски достигнути Небеснаго Царствия, идеже Ангели и вси святии воспевают непрестанными гласы хвалу Пресвятой Троице: Аллилуиа.

Сей Кондак читается трижды, затем Икос 1 и Кондак 1.

Молитва преподобным Кириллу и Марии Радонежским

О раби Божии, преподобнии Кирилле и Марие! Аще и скончали есте временную жизнь свою телом, но духом не отступаете от нас, руководствуете же ны ко Христу Богу, наставляете шествовати по заповедем Господним и носити крест свой и последовати Владыце нашему. Вы, преподобнии, вкупе с преподобным и Богоносным отцем нашим Сергием, вашим возлюбленным сыном, имеете дерзновение ко Христу Богу нашему и ко Святей Его Богоматери. Будите молитвенницы и ходатаи о нас, недостойных, жительствующих во святей обители вашей, ей же вы и начальницы. Будите помощницы и заступницы Богом собранней дружине сей, да жительствующим на месте сем и приходящии с верою, вашими молитвами сохраняеми, невредими от бесов и от человек злых пребудем, славяще Святую Троицу, Отца и Сына и Святаго Духа, ныне, и присно, и во веки веков. Аминь.

Тропарь преподобным Кириллу и Марии Радонежским, глас 3

Блаженств Христовых причастницы, честнаго супружества и попечения о чадех добрый образе, праведнии Кирилле и Марие, плод благочестия, Сергия преподобнаго, нам явившии, с ним же усердно молите Господа низпослати нам дух любве и смиренномудрия, да в мире и единомыслии прославим Троицу Единосущную.

Кондак преподобным Кириллу и Марии Радонежским, глас 4

Днесь, вернии, сошедшеся, восхвалим двоицу блаженную благовернаго Кирилла и Марию добронравную, тыя бо молятся вкупе с возлюбленным сыном своим, преподобным Сергием, ко Единому во Святей Троице Богу, отечество наше в правоверии утвердити, домы миром оградити, юныя от напастей и соблазнов избавити, старость укрепити и спасти души наша.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru