Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист Господу Иисусу Христу, Искупителю грешных


Православные акафисты

Акафист Господу Иисусу Христу, Искупителю грешных

Кондак 1

Агнец Божий снизшел с неба на землю спасти грешныя. Слово первое, еже возглаголал Спаситель мирови: «Покайтеся и веруйте во Евангелие», покаянием бо падшее создание во образ Божий паки возставляется. Приемля с верою сей священный призыв нашего Бога и Искупителя, мы, грешнии, зовем Господу Иисусу Христу, Сыну Божию:

Без числа согрешихом, Господи, прости нас.

Икос 1

Божественным словом спасения, призывая грешных к покаянию, Ты, Христе Иисусе, просветил еси вселенную, подавая людям беззаконным дары любви и всепрощения. Сими бо добродетели надежду спасения в сердца грешных вселяеши, Человеколюбче, сии дары щедрот Твоих приемлем, Господи, и умиленным сердцем взываем Ти:

Иисусе, грешных Спасителю. Иисусе, зла Потребителю.

Иисусе, вселенныя Искупителю.

Иисусе, падших природы Обновителю.

Без числа согрешихом, Господи, прости нас.

Кондак 2

Видя, яко чрез немощь естества своего гибнет в тени смертней род человеческий, Отец Небесный, чада Своя любящий, посла в мир Сына Своего Единородного, да всяк веруяй в Него не погибнет, но имать жизнь вечную. Мы же, недостойнии, верою познавше сию тайну любви Божественныя, благодарно Богу поем: Аллилуиа!

Икос 2

Грешницу-блудницу от побиения каменьми дивно свободивый, тем показал еси, Сыне Божий, яко несть греха, иже не прощен любовию Господа. Уповая на сие безмерное милосердие Твое, просим у Тебе, Всемилостиве, прощение грехов наших, и Тебе, беззаконий человеческих Искоренителю, зовем со умилением:

Иисусе, средостение греховное разоривый.

Иисусе, многобожие идольское упразднивый.

Иисусе, святыню Сиона возлюбивый.

Иисусе, человечество любовию возвеселивый.

Без числа согрешихом, Господи, прости нас.

Кондак 3

Дары любви и всепрощения подай нам, великим грешникам, Всещедрый Иисусе, Сыне Божий, без числа бо согрешихом пред Правдою Твоею вечною. Приими милосердне наши слезы и воздыхания. Сними, Искупителю, с наших сердец бремя тяжкое греховное, да в покаянии душ наших восклицаем Ти, Спасителю нашему: Аллилуиа.

Икос 3

Елей милосердия и вино любви Твоея в приточных сказаниях дивно возлил еси, Сыне Божий, на раны впадшего в разбойники, в сем деянии являя мирови щедроты милосердаго Самарянина. И мы, многогрешнии, испрашивая у Тебе елей любви Твоея на раны душ наших, зовем Ти:

Иисусе, елей и вино на раны человечества изливающий.

Иисусе, и самых отчаянных грешников и беззаконников чудесно спасающий.

Иисусе, сердца к небесам воздвизающий.

Иисусе, пути заблудших исправляющий.

Без числа согрешихом, Господи, прости нас.

Кондак 4

Жизнью назвал еси Себе Ты, Сыне Божий, ибо даруеши всем алчущим насыщение хлебом безсмертия и всем жаждущим напоение водою, текущею в жизнь вечную. Мы же, в суете мира сего погибающии, жаждая страждущим душам нашим жизни вечныя и спасения, с верою в Тя, Источника безсмертия, взываем Ти: Аллилуиа.

Икос 4

Зарю истинного просвещения рождаеши Ты, Свете Вечности, Иисусе Христе, Сыне Бога Живаго, научаеши бо вселенную истине и благочестию. Просвети и нас, Господи, Светом Твоея премудрости и утверди в правилах благочестия, да спасаемии Тобою, с благодарением возопием Ти:

Иисусе, вселенныя просвещение. Иисусе, грешных душ возрождение.

Иисусе, истине научение.

Иисусе, лучами премудрости озарение.

Без числа согрешихом, Господи, прости нас.

Кондак 5

Иисусе, Сыне Божий, Матфея, Левия, Симеона и Андрея, Иакова и Иоанна из тьмы в чудный свет Свой призвавый, призови и наши нечестивыя сердца к покаянию, да в сиянии и благочестии познаем Тебе, Великого Бога нашего и да поживем во свете заповедей Твоих по воле Твоей, хваля величие Твое дивным возглашением: Аллилуиа.

Икос 5

Крайнее снисхождение Твое, Сыне Божий, к людям грешным являеши, врачуя язвы человеческих душ Твоим бесконечным милосердием. Тем же молим Тя, Всещедре, очисти нас от беззаконий наших, уврачуй недуги сердец наших, укрепи во благочестии житие наше, даруй нам силы духовные прославляти Тя, Бога нашего, таковыми словесы:

Иисусе, бездно любве всесвятыя.

Иисусе, сокровище наше милосердия златое.

Иисусе, манно сердцам вечно живая.

Иисусе, палато блаженства драгая.

Без числа согрешихом, Господи, прости нас.

***

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Людие заблужденнии отвергоша Тя, Источника вечнаго спасения, ожесточиша бо разум свой мраком неведения и тления нечестиваго жития. Мы же, свет Истины Твоея через Церковь святую познавше и благодать Твою в таинстве веры восприявше, в радости верующего духа с упованием возглашаем Святыне Истины Твоея: Аллилуиа!

Икос 6

Мудрецы мира сего объюродевшия отвергоша Тя, Истину воплощенную, и удалишася от Тебе, Источника Боговедения; мы же, спасение от Тебе в Церкви Твоей получивше, вопием Ти:

Иисусе, от зла орудие ограждения.

Иисусе, от страстей радосте избавления.

Иисусе, начало духовного возрождения.

Иисусе, луче вечнаго спасения.

Без числа согрешихом, Господи, прости нас.

Кондак 7

Увидевше от слова Божия, яко Бог не желает погубити душу человеческую и помышляет не отринути от Себе даже и отверженного человека, мы дивимся таковому снисхождению Твоему, Человеколюбче, к грешному человечеству и дерзаем вознести Тебе смиренное моление наше: снизойди, Спасителю наш, к немощам нашим, не отрини и нас от Лица Твоего и помысли в сердце Твоем Божественном, како помиловати и нас, беззаконных, в сокрушении духа Тебе вопиющих: Аллилуиа!

Икос 7

О, Спасителю наш, Господи, Премилосердне! Ты с высоты пречестнаго Креста Твоего рекл еси вселенней: «Совершишася», показуя сим, яко ранами Твоими, Кровию и смертию совершил еси спасение греховнаго рода человеческого. О, безмерная любовь Твоя, Христе Боже, к нам, недостойным грешникам! Ибо и в горечи мук Твоих крестных не забыл еси, Человеколюбче, о нашем спасении. Прославляя сии духовные дары любве Твоея, Сыне Божий, возглашаем Ти сице:

Иисусе, спасения нашего совершение.

Иисусе, совести нашея с Богом примирение.

Иисусе, от уз греховных свобождение.

Иисусе, в добродетелех утверждение.

Без числа согрешихом, Господи, прости нас.

Кондак 8

Ни глубина бездн земных, ни дивная высота небесных не могут исчислить бесконечности великия любви Твоея, Сыне Божий, к людям грешным, ибо и с небес снисшел еси Богочеловече, нас ради человек и нашего ради спасения, и смерть восприял еси за род наш и возстал от гроба, да мы пред Богом оправдимся. О, бездна щедрот Твоих, Господи! О, высота милосердия Твоего к грешным людям, Христе Боже! Во умилении сердец наших возглашаем Ти: Аллилуиа!

Икос 8

Аки солнце Божественное, светозарнии лучи милосердия Твоего подаеши Ты, о, Всещедре Иисусе, всем людям праведным и грешным кающимся, и благодатию всепрощения Твоего оживляеши души людей, заблудших и грехами обремененных. Сие снисхождение Твое к нераскаянным влечет в лоно Церкви Божественныя, и ожесточенным дает надежду духовного очищения в тайне покаяния и плачущим о грехах своих отирает очи десницею Твоего Человеколюбия, тем же всем кающимся сердцем нашим взываем Тебе, Христе Человеколюбче:

Иисусе, Солнце вечнаго спасения.

Иисусе, Источниче всепрощения.

Иисусе, кладезю дивнаго очищения.

Иисусе, сокровище всемирнаго освящения.

Без числа согрешихом, Господи, прости нас.

Кондак 9

Бог есть вечный Источник бытия, ведет бо все человечество к источникам истинныя жизни, не желая смерти грешникам. Он всех их, якоже некогда и язычников, с любовию призывает восприяти покаяние в жизнь. И сие творит Господь, дабы грешников привести для вечныя радости в обителях святых Своих. О, Боже наш Христе Иисусе, како возблагодарим Тебе мы, недостойнии, за столь дивное Твое снисхождение? Какие похвалы в дар Твоему человеколюбию принесем мы, раби Твои неключимии? И токмо на милосердие Твое уповающе, дерзаем вознести Тебе преславную песнь: Аллилуиа!

Икос 9

Печаль, яже по Бозе, покаяние неизменно во спасение соделовает, а сего мира печаль смерть соделовает»,— тако глаголет божественный Павел Апостол. И мы, христиане, бежим печали мирския, трепеща мрака духовныя смерти и веруем неложно в велию радость души, приемлющей печаль святыя тайны покаяния. В сем бо таинстве веры нашея дух человеческий от скорбей мира сего чудесно свобождается. Величая святыню сих благодатных даров Твоих беззаконному человечеству, глаголем Тебе, Искупителю грешных:

Иисусе, вершина искреннего покаяния.

Иисусе, искоренение от грехов страдания.

Иисусе, утоление о вечном блаженстве воздыхания.

Иисусе, радосте Царствия Небеснаго ожидания.

Без числа согрешихом, Господи, прости нас.

Кондак 10

Соломон Премудрый некогда исповеда Бога Саваофа Сердцеведцем, Иже не токмо ведает помыслы сердца человеческого, но и милует сие, егда оно, познавши бедствие свое, прострет к Богу руки своя. Тако же и мы, чада Церкви Православныя, исповедуем Сына Божия Сердцеведцем, ведуще, сколь велие бедствие приносит духу нашему греховность человеческая. О, Искупителю грешных, простираем и мы к Тебе наши немощныя руки, обращаем к Тебе наши греховные сердца и смиренно молим: помилуй нас, Господи, помилуй нас. Свободи души наша от путей заблуждения, направи совесть на стезю истинного покаяния, да в раскаянии сердец наших со дерзновением воскликнем Тебе, Искупителю нашему: Аллилуиа!

Икос 10

Грозно возглашает святый пророк Иоанн, Креститель Господень: «Порождения ехиднины, кто сказал вам бежать от будущего гнева? Сотворите убо плоды, достойны покаяния». И мы, немощнии и убозии грешники, умоляем Тебе, Спасителю наш, даровати нам благодатные силы в тайне покаяния, да освободимся праведнаго гнева Твоего на Страшном Суде Твоем, да принесем плоды святыя покаяния. Жаждет дух наш добродетельнаго жития, плачут сердца наша о потерянной святости жизни нашея. Ты Сам, Милосерде, укрепи нас к деланию заповедей Твоих. Ты Сам, Христе Боже, исполни благодатию Божественною немощные сердца наша, да чистыми устами принесем сия возглашения:

Иисусе, вечности красота прекрасная.

Иисусе, разума и сердца жизнь согласная.

Иисусе, победа над плотию безстрастная.

Без числа согрешихом, Господи, прости нас.

Кондак 11

Пророк святый Давид близок бысть к падению, скорбь велия порази немощную совесть его. Соверши беззакония и в сокрушении сердца своего плакася горько. И мы, Господи, выну на краю бездны греховныя и мы слезим о немощах наших. Вемы бо неправды наша, Боже и Господи. Сохрани чистоту душ наших среди искушений мира сего, укрепи волю в добре, очисти сердца наша омофором Твоего безмерного милосердия, да от избытка сердец наших воспоем Богу Всещедрому: Аллилуиа!

Икос 11

Блаженный пророк Иеремия слыша глас на высотах, плакаху бо сынове Израилеви, яко беззаконоваше в путех своих, яко забыша Господа Бога своего. О, Господи, Искупителю грешных! И мы горько плачем о неправдах наших, и мы жестоко скорбим о заблуждении жития нашего, извратихом бо пути христианския добродетели, в суете греховней жизни нашея неправдовахом, Господи, пред Тобою, прости, прости нас, Боже милосердный, и приими от нас, недостойных, сицевая благохваления:

Иисусе, больных душ исцеление.

Иисусе, вечныя радости обновление.

Иисусе, падших пречудное восставление.

Иисусе, драхмы потерянныя нахождение.

Без числа согрешихом, Господи, прости нас.

Кондак 12

Еще чрез пророка Иоиля Ты, Господи, призвал люди Своя к покаянию, глаголя: «Обратитеся ко Мне всем сердцем вашим в посте и плаче и в рыдании» и расторгните сердца ваша и обратитеся ко Господу Богу вашему, яко милостив и щедр есть, долготерпелив и многомилостив. О, Христе Иисусе, сердца наша обращены к Тебе, Богу и Спасителю нашему. Милосердием Твоим снизойди к нам. Долготерпением ободри нас. Сжалься над нами, сирыми и беспомощными среди лютых скорбей злаго мира сего и отврати горькия бедствия от скорбнаго жития нашего. И сподоби нас в вечной славе Твоей вкупе со ангелы непрестанно пети Тебе священную песнь: Аллилуиа!

Икос 12

Иерей Божий и пророк снятый Ездра глаголет о покаянии своем: «Раздрах ризы моя и преклоних колена моя и прострох руце моя ко Господу Богу моему и рекох: «Господи Боже мой, стыжуся и срамлюся воздвигнуть лице мое к Тебе, яко беззакония наша умножишася паче глав наших и прегрешения наша возрастоша даже до неба и в беззакониях наших есмы мы вси плененнии, и в расхищении и в стыжении лица нашего». И мы, о, Христе Боже, на коленях пред Тобою слезно каемся, аки святый Ездра пред Твоим правосудием, и наша беззакония бесчисленны, и наша вина безмерна пред правдою Твоею. И доныне о, Господи, мы страждем и скитаемся и болезнуем, и наготуем, и зело бедствуем в мире сем греховном, но смиренно взываем Божественному снисхождению Твоему:

Иисусе, верных присно спасающий.

Иисусе, благодатию человеки освящающий.

Иисусе, от страстей греховных избавляющий.

Иисусе, лучами блаженства вечнаго вселенную озаряющий.

Без числа согрешихом, Господи, прости нас.

Кондак 13

О, Великий Искупитель грешников, Сыне Божий, Господи Иисусе Христе! Приими от нас недостойных сие искреннее моление и спаси нас для вечныя жизни во обителех Твоих небесных. Изми сердца наша от темныя области греха и неправды, очисти нас святою тайною покаяния, да во святыни добродетельнаго жития нашего прославим Тя преславным славословием: Аллилуиа, Аллилуиа, Аллилуиа!

Сей Кондак читается трижды, затем Икос 1 и Кондак 1.

Молитва Господу Иисусу Христу, Искупителю грешных

О, Боже премилосердне, Христе, Искупителю грешных! Ради спасения грешников Ты оставил еси, Всемилостиве, преславные небеса и вселися еси в юдоль сию плачевную многогрешную. Ты приял еси на Божественныя рамена Твоя наша немощи и понесл еси наша болезни. Ты, о, Страдальче Святый, язвен был еси за грехи наша, и к Тебе, Чадолюбцу, наша смиренная мольба: снизойди к немощам нашим, грехов наших не помяни, ктому и удары возмездия Твоего отврати от душ наших. Кровию Твоею всечестною обновивый падшее грехом естество наше, обнови, Христе Боже, и нас, во тьме греха сущих, и утеши сердца наша радостию всепрощения, с воплем крепким и слезным безмерным припадаем к стопам Твоего небеснаго милосердия. Очисти нас, Боже, всепречистою благодатию Твоею от всех неправд жития нашего, да во святыни Твоего Человеколюбия восхвалим Пресвятое Имя Твое со Отцем Твоим и Преблагим и Животворящим Духом во веки веков. Аминь.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru