Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

ГлавнаяО проектеО центреВаши вопросыРекомендуемНа злобу дняБиблиотека • Новые публикации • Поиск


  Читайте нас:
 Читайте нас в социальных сетях
• Поиск
• Авторы
• Карта сайта
• RSS-рассылка
• Новые статьи
• Фильмы
• 3D-экскурсия

• Это наша вера
• Каноны Церкви
• Догматика
• Благочестие

• Апологетика
• Наши святые
• Библиотека
• Миссия

• Молитвослов
• Акафисты
• Календарь
• Праздники

• О посте

• Мы - русские!
• ОПК в школе
• Чтения
• Храмы

• Нравственность
• Психология
• Добрая семья
• Педагогика
• Демография

• Патриотизм
• Безопасность

• Общее дело
• Вакцинация

• Атеизм

• Буддизм
• Индуизм
• Карма
• Йога
• Язычество

• Иудаизм
• Католичество
• Протестантизм
• Лжеверие

• Секты
• Оккультизм
• Психокульты

• Лженаука
• Веганство
• Гомеопатия
• Астрология

• MLM

• Аборты
• Ювенальщина
• Содом ныне
• Наркомания
• Самоубийство

Просим Вас о
помощи нашему
проекту:

WebMoney:
R179382002435
Е204971180901
Z380407869706

Яндекс.Деньги:
41001796433953

Карта Сбербанка:
4276 8802 5366
8952

Православные акафисты / Акафист праведному Василию Павлово-Посадскому


Православные акафисты

Акафист праведному Василию Павлово-Посадскому

Кондак 1

Избранный угодниче Христов и правыя веры ревнителю, восхваляюще богоугодное житие твое, с любовию почитаем тя. Ты же, яко имея дерзновение ко Господу, от всяких нас бед свободи и благая творити настави, да зовем ти:

Радуйся, Василие, милостивый наш заступниче.

Икос 1

Ангелов Создатель избра тя, святе Василие, яко вернаго служителя Своего, измлада восприемшаго начатки доброделания и молитвы. Князь же мира сего потщася погубити тя. Ты же, отче, от Бога вразумленный, слезами покаяния душу от скверны греховныя омыл еси и житием богоугодным просиял еси, сего ради вопием ти:

Радуйся, от родителей благочестивых рожденный.

Радуйся, добродетели теми наученный.

Радуйся, во отрочестве кротость и послушание явивый.

Радуйся, от лет младых святыя книги возлюбивый.

Радуйся, во искушениих юности от Бога не отвративыйся.

Радуйся, внезапною кончиною богохульника вразумивыйся.

Радуйся, покаянием с Богом примиренный.

Радуйся, правыя веры ревнителю кроткий и смиренный.

Радуйся, Василие, милостивый наш заступниче.

Кондак 2

Видя человеколюбивый Владыка твоего сердца искреннее покаяние, призва тя ко обители Никольстей, идеже, от чудотворнаго образа Спасова исцеление улучив, радостно воспел еси Богу: Аллилуиа.

Икос 2

Разума Божественнаго взыскуя, мудрейших себе вопрошал еси, праведне Василие. Темже благоразумному совету старца Венедикта, еже в мире жити и Церковь от неправых учений защищати, последовал еси. Мы же послушание твое восхваляюще, вопием ти сице:

Радуйся, мытареву покаянию подражавый.

Радуйся, плачем сокрушенным грехи своя омывый.

Радуйся, страх Божий в сердце твоем стяжавый.

Радуйся, о Суде Божием людем возвещавый.

Радуйся, наставление мудраго пастыря смиренно приемый.

Радуйся, святым отцем в житии последовавый.

Радуйся, Пречистыми Тайнами душу твою напитавый.

Радуйся, единому Господу и Церкви Его работати возжелевый.

Радуйся, Василие, милостивый наш заступниче.

Кондак 3

Сила Вышняго укрепи тя к исполнению словес апостольских, сего ради вседушно потщался еси похотей плотских отвращатися, очи горе устремляти и гордость житейскую любовию к Отцу Небесному препобеждати. Темже помози нам исполнити заповеди Христа Бога, Емуже поем: Аллилуиа.

Икос 3

Имея попечение о пользе ближняго, противостал еси кознем диавольским, святе Василие, и, яко доблий воин Христов, клевету и поношения смиренно претерпевая, многия заблуждшия души, расколом уязвленныя, во ограду церковную привел еси. Мы же, труды твоя зряще, восхваляем тя сице:

Радуйся, благодатию Духа Святаго просвещенный.

Радуйся, в броню правды Божия оболченный.

Радуйся, свет веры Православныя людем явивый.

Радуйся, многия от раскола к Церкви обративый.

Радуйся, Бога и ближняго нелицемерно возлюбивый.

Радуйся, суетныя увеселения презирати научивый.

Радуйся, во искушениих твердость веры и упования показавый.

Радуйся, добродетельным житием твоим Бога прославивый.

Радуйся, Василие, милостивый наш заступниче.

Кондак 4

Бурю нашедших на тя искушений кротко претерпевая, святе Василие, незлобием и нелицемерным благочестием многая окаменелая сердца умягчил еси. Темже и раб Христов благий и верный от всех познался еси. Мы же, восхваляюще Бога, дивнаго во святых Своих, поем Ему: Аллилуиа.

Икос 4

Слышаще людие доброе твое житие, притекаху к тебе, угодниче Христов, совета и утешения в нуждах просяще. Ты же, монашескаго жития взыскуя, сердцем смущался еси, обаче, явлением святаго Харалампия наставленный, попечение о душах, во ограду Церкви возвращенных, возымел еси. Сего ради ублажаем тя тако:

Радуйся, скорый помощниче к тебе прибегающим.

Радуйся, добрый утешителю страждущим.

Радуйся, мудрый советниче добродетельнаго жития взыскующим.

Радуйся, теплый молитвенниче, лютыя болезни прогоняющий.

Радуйся, душеполезный собеседниче людей благочестивых.

Радуйся, крепкий защитниче бедных, убогих и сирых.

Радуйся, воли Господни усердный исполнителю.

Радуйся, обратившихся от раскола мудрый врачевателю.

Радуйся, Василие, милостивый наш заступниче.

Кондак 5

Богосветлую звезду, ко Христу приводящую, познаша тя благочестивии людие, Василие праведне, и просвещаеми светом твоим, шествоваху путем Господних заповедей, прославляюще Бога и поюще Ему: Аллилуиа.

Икос 5

Видев Иаков, купец богобоязненный, добродетельное житие твое, святе Василие, ввери себе твоему совету и постави тя управителя имения своего. Ты же, попечение о мире, пользе душевней и благоденствии труждающихся имея, образ мудраго правления показал еси. Сего ради прославляем тя тако:

Радуйся, тесным и претрудным путем шествовати научаяй.

Радуйся, всякое дело во славу Божию творити призываяй.

Радуйся, бедных и немощных утешаяй.

Радуйся, богатых человеколюбию научаяй.

Радуйся, страстьми обуреваемых тихое пристанище.

Радуйся, в скорбех пребывающих скорое утешение.

Радуйся, Богу всегда благодарение приносивый.

Радуйся, благословение Отца Небеснаго стяжавый.

Радуйся, Василие, милостивый наш заступниче.

Кондак 6

Проповедник премудр явился еси, отче Василие, люди наставляя, яко несть беда скорби мира сего претерпевати, обаче скорбь велия есть веру православную оставити и житие христианское погубити. Сего ради взываем ти: моли Бога о нас, грешных, да укрепит нас Господь веровати в Него и заповеди Его соблюдати, да всегда зовем: Аллилуиа.

Икос 6

Возсиял еси людем страждущим, отче праведне, яко новый Филарет Милостивый: егда бо тленное богатство улучаше, не прилагал еси тому сердце твое, но щедро убогим раздавал еси и всем, просящим, вспомоществовал еси. Сего ради, прославляюще милосердие твое, вопием сице:

Радуйся, путь служения Богу и ближним избравый.

Радуйся, богатством земным сокровища небесная стяжавый.

Радуйся, девства и чистоты ревнителю.

Радуйся, молитвы и воздержания учителю.

Радуйся, о благолепии храмов и обителей попечение имевый.

Радуйся, уставы церковныя усердно хранивый.

Радуйся, наипаче Царствия Небеснаго взыскавый.

Радуйся, Господа всем сердцем возлюбивый.

Радуйся, Василие, милостивый наш заступниче.

Кондак 7

Хотя святитель Филарет рану душепагубнаго раскола уврачевати, обитель Преображенскую в веси Гуслицкой устрои, и тя, отче, яко мужа праведна, имети попечение о той благослови, да многия люди паки чада Церкве соделаются и Богу воззовут: Аллилуиа.

Икос 7

Новую возжелал еси обитель создати в Посаде Павловстем, святе Василие. Аще и братию собрал еси и начало трудом положил еси, обаче не свершися дело сие при жизни твоей. Последи же молитвами твоими воздвижеся обитель во имя Покрова Пречистыя Богородицы, идеже и святыя мощи твоя упокоишася. Мы же, ревность твою о славе Божией восхваляюще, вопием сице:

Радуйся, благая семена жития монашескаго в Посаде Павловстем насадивый.

Радуйся, плоды доброделания тамо возрастивый.

Радуйся, чистоты и трезвения проповедниче.

Радуйся, послушания воли Божией наставниче.

Радуйся, крепкую веру во всесильный Промысл Божий явивый.

Радуйся, ненавидящия тя по заповеди Христовой возлюбивый.

Радуйся, злоречие враждующих на тя с кротостью и незлобием терпевый.

Радуйся, благодатный дар плача о гресех стяжавый.

Радуйся, Василие, милостивый наш заступниче.

Кондак 8

Странное для сынов века сего возвещал еси блаженство, праведне Василие, воспоминая словеса Писания: блажен муж, емуже не вменит Господь греха, паче же блажен, в егоже устех не обретается лесть. Научи и нас, отче, приносити достойныя плоды покаяния и хранити язык от словес неправедных и лукавых, но во умилении воспевати Богу: Аллилуиа.

Икос 8

Весь в молитве пребывая и благими деяньми Богу служа, святе Василие, дар исцеления от Господа приял еси. Темже, приходящих к тебе елеем от лампады помазуя и тяжкия недуги врачуя, всех к усердней молитве призывал еси. Мы же, предстателя тепла пред Богом тя ведуще, зовем таковая:

Радуйся, призываяй хранити уста от празднословия.

Радуйся, научаяй нас отвращатися клеветы и злословия.

Радуйся, ходатайством твоим чтущия тя не оставляяй.

Радуйся, к молитве усердней нас призываяй.

Радуйся, крине добродетелей благоуханный.

Радуйся, сосуде благодати Богом избранный.

Радуйся, житием твоим путь ко Господу указуяй.

Радуйся, благодатию Духа Святаго недуги врачуяй.

Радуйся, Василие, милостивый наш заступниче.

Кондак 9

Всякое помышление в болезнех телесных ко Господу устремляя, из глубины сердца твоего, святе Василие, псаломски взывал еси: Ты еси Прибежище мое от скорби обдержащия мя. Радосте моя, избави мя от обышедших мя. Прославляюще всецелое упование твое на Господа, поем Ему: Аллилуиа.

Икос 9

Ветии многовещаннии не возмогут по достоянию изглаголати тайныя подвиги о Бозе тобою содеянныя, праведне Василие. Мы же, дивящеся смирению, терпению и упованию твоему на Господа в тяжких телесных недузех твоих, зовем сице:

Радуйся, во страданиих телесных славословие Богу приносивый.

Радуйся, молитвы о себе у ближних со смирением просивый.

Радуйся, терпение во искушениих, яко дар многоценный, стяжавый.

Радуйся, все упование на премудрый Промысл Божий полагавый.

Радуйся, в скорбех на милость Божию надежду не оставивый.

Радуйся, во всяком обстоянии благодарение Богу возносивый.

Радуйся, своевольная желания отсекати наставляяй.

Радуйся, плотское мудрование духу повиновати научаяй.

Радуйся, Василие, милостивый наш заступниче.

Кондак 10

Спасти хотя душу твою, угодниче Христов, тако взывал еси: Иисусе Сладчайший! Просвети мысли моя сердечныя и даждь ми память смертную. Ныне же, во Царствии Небеснем предстоя престолу Божию, молися о нас грешных, да и мы, памятующе о кончине своей, очистим души покаянием и в радости воспоем Богу: Аллилуиа.

Икос 10

Царя Небеснаго возлюбив всем сердцем, праведне Василие, и провидя приближение исхода твоего, все упование возложил еси на Него, сице взывая: Ты еси, Иисусе, Надеждо в смерти моей и Животе по смерти, и утешение на Суде Твоем. Темже, ублажающе праведную кончину твою, со умилением взываем:

Радуйся, со страхом Божиим время жития твоего проводивый.

Радуйся, любовь ко Христу деланием заповедей Его явивый.

Радуйся, память смертную во уме стяжавый.

Радуйся, имя Сладчайшаго Иисуса в сердце носивый.

Радуйся, Бога всею душею и всем помышлением возлюбивый.

Радуйся, Ему единому в мире сем скоропреходящем служивый.

Радуйся, угодниче Божий, ныне со всеми святыми пребываяй.

Радуйся, молитвенниче усердный, на нас, грешных, милосердие Божие призываяй.

Радуйся, Василие, милостивый наш заступниче.

Кондак 11

Пение похвальное приносим ти, праведне Василие, яко и по отшествии твоем не оставляеши нас, чад твоих, но избавляеши от всяких бед и зол, подавая исцеления всем, к раце мощей твоих притекающим. Темже, радующеся, прославляем прославльшаго тя Господа, вопиюще Ему: Аллилуиа.

Икос 11

Светом добродетельнаго жития твоего сияя, монашествующим и мирским путь ко спасению указал еси, блаженне. Темже и по смерти твоей нас, грешных, наставляеши искати Царствия Божия и правды его и во всем повиноватися закону Христову. Сего ради взываем ти сице:

Радуйся, по отшествии твоем ко Господу нас не оставляяй.

Радуйся, страждущих от недугов многоразличных избавляяй.

Радуйся, матерь со чадом, у гроба твоего молящихся, от неисцельнаго недуга уврачевавый.

Радуйся, девицу от болезни главныя избавивый.

Радуйся, отроковицу согбенную от недуга исцеливый.

Радуйся, глухой девице слух возвративый.

Радуйся, неверующих в праведность твою мудре вразумивый.

Радуйся, многими чудесы от Господа прославляемый.

Радуйся, Василие, милостивый наш заступниче.

Кондак 12

Благодатию всещедраго Бога посрамишася людие нечестивии злобне оклеветающии имя твое, егда лютое гонение воздвижеся на Церковь Православную. Но яко прах, егоже возметает ветр от лица земли, разсыпашася лукавыя наветы их и возсия память твоя по всей земли нашей. Мы же, ведуще тя молитвенника тепла пред Богом, поем Ему: Аллилуиа.

Икос 12

Поюще труды и подвиги твоя, ликовствуем, праведне Василие, яко чудное дарование от Господа явися Посаду Павловскому во обретении честных мощей твоих. Темже, величающе прославльшаго тя Господа, похвальная тебе приносим:

Радуйся, во обители, молитвами твоими устроенней, благоговейно почитаемый.

Радуйся, в земли Московстей светло прославляемый.

Радуйся, яко яви Господь в день прославления от мощей твоих дивное благоухание.

Радуйся, о Бозе с любовию приемляй наша молитвы и воздыхания.

Радуйся, людей, притекающих к мощем твоим, от тяжких недугов свобождаяй.

Радуйся, жены неплодныя, с верою молящияся тебе, от бесчадия избавляяй.

Радуйся, праведниче, возлюбивый молитву, милосердие и смирение.

Радуйся, верный сыне Церкве Христовы, обретый вечное спасение.

Радуйся, Василие, милостивый наш заступниче.

Кондак 13

О, преславный угодниче Божий, святый праведный Василие! Приими сие малое моление от нас, недостойных, с верою и любовию тебе приносимое. Испроси нам у Господа Бога покаянием грехи наша омыти, скорби, к пользе нашей попускаемыя, с терпением носити, наипаче же смирение, любовь к Богу и ближним стяжати, да сподобимся с тобою воспевати Пресвятей Троице: Аллилуиа.

Сей Кондак читается трижды, затем Икос 1 и Кондак 1.

Молитва праведному Василию Павлово-Посадскому

О, пречудный угодниче Христов Василие! Ты, заповеди Господни возлюбив и иго Христово благое на рамо прием, в мире праведно пожил еси и, в подвизех потрудився, дары благодати от Бога приял еси. О спасении же заблуждших ревновавый, ты многия во ограду церковную возвратил еси. Темже Господь тя прослави и многими чудесы обогати. Ныне же, престолу Божию предстоя, моли Пресвятую Троицу, да сохранит Отечество наше в мире глубоце, да утвердит в нем веру Православную, Церковь Русскую да соблюдет от расколов и ересей непоколебиму. Нам же, к раце мощей твоих припадающим и чтущим любовию святую память твою, дарует время на покаяние и в добродетелех преспеяние, да, в мире сем богоугодне поживше, Царствия Небеснаго достигнем, идеже вкупе с тобою сподобимся прославляти Отца и Сына и Святаго Духа во веки веков. Аминь.

 

 
Читать другие акафисты раздела "Православные акафисты"
 

Миссионерско-апологетический проект "К Истине"

Читайте также:



© Миссионерско-апологетический проект "К Истине", 2004 - 2018

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Рейтинг@Mail.ru