Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист священномученику Василию Мартышу


Православные акафисты

Акафист священномученику Василию Мартышу

Кондак 1

Избранный сыне народу польскаго, предивный угодниче Христов, веры православныя неутомимый благовестниче, яко добрый сеятель на ниве Христове, в сердца чад Божиих истину Христову в старом и новом свете, усердно всеял еси. Ныне же, во славе со ликом мученик добропобедных Иисусу Сладчайшему предстояще, не престай молитися за ны ко Господу, да дарует народом славянским мир и безмятежие, церкви Святей Своей от ересей и расколов ограждение, да твоими молитвами от бед избавляеми, благодарно зовем ти: Радуйся, священномучениче Василие, Церкви Польския похвало и всех православных утверждение.

Или: Радуйся, молитвениче наш, скорый помощниче, священномучениче Василие.

Икос 1

Ангела пламенеюща духом и во плоти суща человека, избра тя Господь быти служителя Церкви Святей и стаду Своему пастыря добра, от юности бо твоея Богу Единому сердцем и душею прилежал еси. Мы же имуще в тебе образ пастыря добра умильно взываем ти:

Радуйся, Богом избранный и освященный наш пастырю.

Радуйся, чистый разумом, всею душею Бога возлюбивый.

Радуйся, в житии твоем Тому усердно послуживый.

Радуйся, в незлобии сердце твое соблюдый.

Радуйся, иго Христово от юности радуяся восприявый

Радуйся, яко в подвизе твоем имя пресвятыя Троицы дивно прославися.

Радуйся, просвещение мудростию Божиею сущих в неверии.

Радуйся, верность Православию мученичеством доказавый.

Радуйся, священномучениче Василие, Церкви Польския похвало и всех православных утверждение.

Кондaк 2

Видя Господь вeлию веру и усeрдие твое к Нему, яко измлaда прилежaл еси божеcтвенней службе и всякому благочeстию, и на служeние пастыря для народов заморских, а послеже и воинов польских постaви. Ты же подвиг сeй добльственне совершaл еси, выну воспевaя благодеющему и укрепляющему тя Христу Богу: Аллилуиа.

Икос 2

Рaзумом богопросвещeнным в познaнии истины преуспевaл еси, достоблажeнне Василие, мудростию духовною обогащaяся, исполняяся крепости божеcтвенныя, добродетели евангельския невозврaтно души своeй присвояя. Темже мы, покланяющеся милоcердному Богу, таковы дивны сокровища тебе даровaвшему, во умилeнии глаголем ти:

Радуйся, родителей благочестивых отрасль благоуханная.

Радуйся, в купели святаго крещения благодатию Духа Святаго просвещенный.

Радуйся, Пастыреначальника Господа нашего Иисуса Христа благоволение.

Радуйся, благочестию родительскому измлада поревновавый.

Радуйся, в творении заповедей Божиих себе чиста издетска утвердивый.

Радуйся, от юности твоея вся мира сего красная, Бога ради, презревый.

Радуйся, яко от утра жизни твоея на стражу словеснаго стада избран был еси.

Радуйся, яко до вечера жития твоего сущия в вере нелестно назидал еси.

Радуйся, священномучениче Василие, Церкви Польския похвало и всех православных утверждение.

Кондак 3

Силою Христовою укрепляемый, прехвальне отче Василие, несомненне упования твоя на Иисуса Сладчайшего возложил еси, и со смирением приял еси назначение на служение пастырское в Новом Свете, подвигом добрым подвизатися хотящи. Евангельстей истине поревновавши, сораспятися Господу всем сердцем возжелал еси, по пути спасения за Ним последовал еси, веру в Троицу Божественную проповедовал еси в странех хладных и полночных, Богу же с благодарностию за всех и вся вопиющи: Аллилуйя.

Икос 3

Имея помысл чист и душу непорочну, священства благодать достойно восприял еси, отче Василие; наставлением святителя Тихона и иных наставник духоносных благоговейно внимая, ревностно подвизался еси о спасении Богом врученнаго тебе словеснаго стада. И восходя благодатию Божиею от силы в силу, вел еси за собою всех тех, кои жаждущи душевнаго спасения, внимали твоему душеполезному учению, ведая образ твоего чистаго жития. Сего ради вопием ти сице:

Радуйся, селения Господня - храмы святые паче всех селений земных возлюбивый.

Радуйся, Божественныя службы и Христова учения паче всех деяний взыскававый.

Радуйся, евангельских велений верный блюстителю.

Радуйся, Христовых словес твердый хранителю.

Радуйся, креста своего усердный носителю.

Радуйся, иго Христово и бремя Его благодушно подъемый.

Радуйся, яко не обративыйся вспять в шествии к Горнему Иерусалиму.

Радуйся, яко Сладчайшему Иисусу до конца послужил еси.

Радуйся, яко наслаждаешися лицезрения Божия.

Радуйся, священномучениче Василие, Церкви Польския похвало и всех православных утверждение.

Кондак 4

Бурею страстей и треволненьми во многомятежном мире непоколебимый в тихое пристанище спасения душу твою управил еси, вся благая и красная мира презрев, призывая и всех быти причастником горняго Царствия, идеже ныне пребываеши, поя Богу: Аллилуиа.

Икос 4

Слыша слово Господа, чрез пророка глаголюща: "призови Мя в день скорби твоея, и изму тя", ты, святый Василие, в скорбех и тяготех своих прибегал еси ко Господу, прося умножити и укрепити веру твою. Темже молимся ти: укрепи слабую веру и в нас немощных, зовущих ти тако:

Радуйся, плоды духовныя: любовь, мир и долготерпение стяжавший.

Радуйся, пример смирения, кротости и воздержания подававший.

Радуйся, слабую веру выну незыблемою бытии сотворяющий.

Радуйся, жертвенной любови к ближнему научающий.

Радуйся, вопреки скорбем лучами животворныя надежды озаряющий.

Радуйся, от страстей греховных волю нашу исцеляющий.

Радуйся, укреплятися таинствами Церкви всех нас сподвигающий.

Радуйся, в возрастанию и разумению духовному нас утверждающий

Радуйся, священномучениче Василие, Церкви Польския похвало и всех православных утверждение.

Кондак 5

Боготечная звезда в скорби сущим явился еси, богоглаголивый проповедниче Василие,Ты же, любовию ко Христу пламенея и взирая на страдания Его, безбоязненно призывал еси паству свою: имети совесть незазорную и любити друг друга, якоже Господь возлюбил нас, во еже, не токмо зде, но и в селении праведных, воспевати Творцу нашему: Аллилуиа.

Икос 5

Видевше, в немногих храмах, подобно оазисам в бескрайней язычества и теплохладия пустыне стоящих, американскую паству твою у источников истиннаго богопочитания и благочестия пиющую воду живу, апостолом Христовым соревнуя, силою Божиею, святый Василие, превозмогал еси немощи и болезни твоя, благовременне и безвременно усердно сию посещал еси, назидая в вере, укрепляя в надежде и утверждая в любви. Сего ради вернии научишася воспевати тебе таковая:

Радуйся, на путь истинный заблудшия направляющий.

Радуйся, земли Американской исповедниче и покровителю.

Радуйся, словом мудрым всех притекающих в лавку к тебе питающий.

Радуйся, светильниче имже мнози человецы просвещаются.

Радуйся, мир с Господом сбрегати и хранити помогаяй.

Радуйся, милость Богородицы ко всем нам приклоняющий.

Радуйся, дарами благости и милосердия молящихся тебе богащающий.

Радуйся, священномучениче Василие, Церкви Польския похвало и всех православных утверждение.

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедание медоточивых уст твоих, богоглаголиве Василие, никогдаже источашеся, ниже заграждашеся, преславне исповедниче Христов, ты бо неустанно благовествовал еси многоплеменным людем Новаго Света, по бескрайним просторам Америки полночной разсосредоточенным, от обычаев душетленых словом и примером жития твоего отвращатися призывая, да поют вси Господеви песнь покаяния и благодарения: Аллилуия.

Икос 6

Возсия свет твоих добродетелей, блаженне Василие, и Христоподражательныя любве твоея всем ищущим спасения вечнаго и путем скорбным и тернистым со упованием и непреклонною верою в силу Божию, в немощи человеческой совершающуюся, шествующим. Иже, благодаряще Бога, даровавшего им зрети в тебе благодать, юже апостол языков Павел исповеда, вопия: вся могу о укрепляющем мя Христе Иисусе, во умилении возглашают ти таковая:

Радуйся, скорбей сердец наших успокоение благодатное.

Радуйся, кичений ума нашего благодатное умирение.

Радуйся, тлетворных и душевредных страстей скорое обуздание.

Радуйся, от пустословия и осуждения чтущих тя отвращающий.

Радуйся, очей разума нашего преславное озарение.

Радуйся, совести нашея страже недремлющий.

Радуйся, сущым в бедах скоро и преславно помогаяй.

Радуйся, скорби и печали в радость претворяяй.

Радуйся, велие милосердие Божие к земнородным приклоняющий.

Радуйся, священномучениче Василие, Церкви Польския похвало и всех православных утверждение.

Кондак 7

Хотя Всевидец Господь явити тя светильника державы нашея, и не под спудом, а на свещнице высокой поставити, паки тя в державу Польскую возврати, да явлен будеши мирови. Людие же православнии аки бисер многоценный обретшии тя, радовахуся неизреченно и возсылаху благодарственное пение Богу: Аллилуиа.

Икос 7

Дивныя и доблестныя подвиги твоя восхваляюще, добропобедне воине Христов Василие, ублажаем тя, яко права веры Православныя отстаивал и пред правителями Речи Посполитой, яко ближние и дальние, к тебе текоша за добрым советом и помощию, яко мнозие утешение от тебе с радостию прияша. Ты же усердно внимал еси людям, пася их прилежно и нужды их исполняя, и за все повелевая благодарити Творца всея твари. Темже и мы, тя почитающе, ублажаем зовуще:

Радуйся, розго винограда Христова, мног плод в пособие православным творящая.

Радуйся, благовестителю света Христова, омраченная очеса и сердца народа просвещаяй.

Радуйся, служителю Божий, гонения правды ради смиренно претерпевый.

Радуйся, провозвестниче Благодати, сумнящихся в вере словом Божиим утверждаяй.

Радуйся, пастырю Богомудрый, православное юношество ко спасению наставляй

Радуйся, добрых нравов и любве к Богу и ближним насадителю.

Радуйся, великий предстателю бедствующих в море житейстем.

Радуйся, благодатный утешителю всех славящих имя твое.

Радуйся, священномучениче Василие, Церкви Польския похвало и всех православных утверждение.

Кондак 8

Странника и пришельца себе на земли быти помышляя, в земней жизни своей бывше, пастыреначальнику Христу последующе, не имел еси где главы подклонити, ради неусыпных трудов ваших о пастве своей; покоя не имуще, назирал еси ю, взывающе к Богу: Аллилуиа.

Икос 8

Весь в Бозе быв, преславне отче Василие, о Бозе и угождении Ему, всецело послужил еси ближним твоим учаще оныя словом и делом, како надлежит во благочестии жити, приходиша к тебе ближнии и дальнии послушати словес твоих и житию добродетельному учитися. Молим тя, угодниче Божий, сподоби и нас хладных воспламенитися любовию ко Господу, да возможем неосужденно вопити тебе:

Радуйся, грешники на покаяние наставивый.

Радуйся, кающыяся с Богом примиривый.

Радуйся, отец чадолюбивый учеником твоим бывый.

Радуйся, немощи немощных любвеобильно носивый.

Радуйся, от винопития и суемудрия прехвально исцеляющий.

Радуйся, в Бозе слабыя души наша досточудно обновляющий.

Радуйся, ревновати о своем спасении нас научающий.

Радуйся, к незамутненному познанию путей Господних нас обращающий.

Радуйся, священномучениче Василие, Церкви Польския похвало и всех православных утверждение.

Кондак 9

Всем приходящим к тебе, священомучениче прехвальне, отец чадолюбивый был еси, наставляя на путь спасения, советами утешая и укрепляя, отгоняя уныние бесовское от душ. В годину велиего испытания военнаго народ польский в вере Христовей утверждал еси, сомнения и маловерия удалитися призывая. Чада же твоя духовныя же надежды исполняяся, благодарне воспеваху о тебе Господеви: Аллилуия.

Икос 9

Вития богомудрый был еси, преславне отче наш Василие, и языком твоим, яко тростию книжника скорописца, закон Бога твоего начертавал еси на сердцах вверенных тебе воинов польских, верно показуя им путь ко спасению, по немуже сам неуклонно шествовал еси до самыя мученическия твоея кончины. Темже приими от нас похвалы таковыя:

Радуйся, главо святая, благодатию Божиею осененная.

Радуйся, проповедниче сладкоглаголивый, вещавый словеса жизни вечныя.

Радуйся, душевными твоими очима выну Господа созерцавый.

Радуйся, пред лицем Божиим, яко раб пред Господем ходивый.

Радуйся, пред Оным, яко сын пред Отцем, яко ученик пред Учителем шествовавый.

Радуйся, во вся дни живота твоего Его искавый и в Нем намерение полагавый.

Радуйся, ищущим Царствия Небеснаго спасительнаго пути проповедниче.

Радуйся, взыскующим горняго Иерусалима богомудрый вождю.

Радуйся, священномучениче Василие, Церкви Польския похвало и всех православных утверждение.

Кондак 10

Спасти хотя душу свою, вся земная и временная во уметы вменил еси, богомудрый Василие, неуклонно крестным путем Спасителеви последствовал еси, муки душевныя, страдания разнообразныя, осмеяния и заушения, унижения и биения претерпел еси от богоборцев зверонравных Сего ради освятился еси и неизреченныя милости сподобился еси со Ангелы и всеми святыми в небеснем царствии пети Богу: Аллилуйя.

Икос 10

Стена тверда и ограждение крепкое явился еси, многострадальне исповедниче, к тебе прибегающим и молитвеннаго предстательства твоего просящим в новых испытаниих веры сущих. Ты же, святый заступниче наш Василие, буди предстателем пред Богом за нас многогрешных, с верою и упованием вопиющих ти таковая:

Радуйся, гонения и смерть от нечестивых претерпевый.

Радуйся, от державы земныя во чертози небесные прешедый.

Радуйся, молитвою к Богу укрепившеся и благословение вечное от Него восприемый.

Радуйся, подвижниче веры, угождение Богу от юности предызбравый.

Радуйся, путеводителие, правую стезю к вечному спасению нам показавый.

Радуйся, омраченные зловерием, Светом Веры Христовы просвещаяй.

Радуйся, в Бозе слабыя души наша досточудно обновляющий.

Радуйся, в возрастанию и разумению духовному нас утверждающий.

Радуйся, священномучениче Василие, Церкви Польския похвало и всех православных утверждение.

Кондак 11

Пение, иже приносим тебе, в похваление преславных подвигов и чудес твоих, достоблаженне Василие, несть довольно, обаче ведаем благое твое о нас тщание и любовь твою. Благоволи, заступниче наш многомилостиве, вняти молитвам нашим и избавити нас от прелести еретическаго зловерия и языческаго злонравия, да утренююще, чистым сердцем приносим о тебе песнь Христу Богу: Аллилуия.

Икос 11

Светозарнаго светильника, елея молитвы чистыя преисполнена, и пламенем веры светло сияюща, воздвиже тя Господь, священномучениче Василие, Богохранимей земле Польской. Мы же, видем тя в Троическом Свете пребывающаго и всем христианом мира и благоденствия просящаго, с упованием веры, зовем ти

Радуйся, Христа паче благ временных чтити наставляющий.

Радуйся, земныя пути наша ко благу присно устрояющий.

Радуйся, в добродетелех смирения и братолюбия утверждающий.

Радуйся, мечем молитвы пламенной нас охраняющий.

Радуйся, огнем Духа Святаго плевелы зловерия пожигающий.

Радуйся, омраченныя умом к Свету Истины приводяй.

Радуйся, о спасении народа нашего всеусерднейший попечителю.

Радуйся, добрых нравов и благочестия веры насадителю.

Радуйся, священномучениче Василие, Церкви Польския похвало и всех православных утверждение.

Кондак 12

Благодать от Бога ти данную ведуще, прилежно молим тя, отче наш предивный: пролей теплую молитву о нас ко Господу, да дарует нам веру нелицемерную, дух покаяния и смирения, да воспоем Ему со умилением: Аллилуия.

Икос 12

Воспеваем богоугодное житие твое и кончину мученическую, богоносне Василие, величаем смирение и мудрость твою; торжествуем на земли небесную славу твою и веруем непреложно, яко много может молитва твоя, угодниче Господень, пред престолом Всемилосерднаго Царя Небеснаго. Его же моли возродити веру истинную в державе польстей, и ны в ней твердыми и плодоносными быти сотвори, горести и печали наша утоли, радости и утешения нам ниспошли. Сего ради взываем ти с надеждою сице:

Радуйся, благоутробия щедроты обильно всем даруяй.

Радуйся, ближних и дальних милостьми твоими ущедряяй.

Радуйся, бремя крестов наших преславно облегчаяй.

Радуйся, отрадою духовною все житие наше наполняяй.

Радуйся, истины взыскующим озарение благодатное ниспосылаяй.

Радуйся, от прельщений бесовских и заблуждений человеческих избавляяй.

Радуйся, скорбящих благий утешителю. Радуйся, унывающих благодатный ободрителю.

Радуйся, священномучениче Василие, Церкви Польския похвало и всех православных утверждение.

Кондак 13

О, многострадальне и всехвальне страстотерпче Василие! Приими малое сие моление наше, воздыханием сердец наших приносимое. И испроси, венчавшаго тя Господа, земли нашей благоденствия, людем же всем чистоты сердечныя и телесныя, благочестия, мира, братолюбия, милосердия и ревности об истине Христовей. Да Благодатию укрепляеми и утешаеми, сподобимся в Царствии Небесном вкупе с тобою пети Богу: Аллилуиа.

Молитва священномученику Василию Мартышу

О, прехвальный священномучениче и пастырю добрый словесных овец Христовых, отче наш Василие, скорый наш заступниче и помощниче в скорбех, бедах и всяких нуждах. Услыши нас грешных, к тебе прибегающих и молящихся. Испроси предстательством твоим у Всемилостиваго Бога нашего мир Церкви Его, под знамением Креста воинствующей, тишину помыслов наших, воздержание от пагубных страстей и покаяние.

Ей, чадолюбивый и милостивый отче наш, священномучениче Василие! Тебе, предстоящему Престолу Господню, ведомы вся нужды наша духовныя и житейския. Призри на нас отеческим оком и твоими молитвами утверди нас в вере, надежде и любве, суемудрия и расколы истреби, болящия исцели, печальныя утеши, обиженныя заступи, бедствующим помози, путешествующим спутешествуй. Не посрами нас, угодниче Божий, к тебе с верою притекающих, но яви древния милости твоя, имиже отцем нашим вспомоществовал еси, не отрини и нас, предстоящих всечестней иконе твоей, яко тебе живу сущу.

Умоли убо Милостиваго Бога сохранитися нам до кончины дней наших в страсе Божием, и да отпустит нам Господь вся прегрешения наша вольная и невольная, и твоим предстательством сподобит радости вечныя и насладитися купно с тобою и со всеми святыми, во веки веков. Аминь.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru