Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

ГлавнаяО проектеО центреВаши вопросыРекомендуемНа злобу дняБиблиотека • Новые публикации • Поиск


  Читайте нас:
 Читайте нас в социальных сетях
• Поиск
• Карта сайта
• RSS-рассылка
• Новые статьи
• Фильмы

• Это наша вера
• Каноны Церкви
• Догматика
• Благочестие

• Апологетика
• Наши святые
• Миссия

• Молитвослов
• Акафисты
• Календарь
• О посте

• Мы - русские.
• ОПК в школе
• Чтения
• Храмы

• Нравственность
• Психология
• Добрая семья
• Педагогика
• Демография

• Патриотизм
• Безопасность

• Общее дело
• Вакцинация

• Атеизм

• Буддизм
• Индуизм
• Карма
• Йога
• Язычество

• Иудаизм
• Ислам
• Католичество
• Протестантизм
• Лжеверие

• Секты
• Психокульты
• Оккультизм
• Лженаука
• Гомеопатия
• Астрология

• MLM

• Аборты
• Ювенальщина
• Содом ныне
• Наркомания
• Самоубийство

Просим Вас о помощи нашему проекту:

WebMoney:
R179382002435
Е204971180901
Z380407869706

Яндекс.Деньги:
41001796433953

Карта Сбербанка:
4276 8802 5366
8952

Православные акафисты / Акафист святителю Митрофану Воронежскому


Православные акафисты

Акафист святителю Митрофану Воронежскому

Кондак 1

Страстей победителю, в броня чудес оболкшемуся, в скорбех скорому помощнику, у Господа велие дерзновение имущему, како не возопием:

Радуйся, Первопрестольниче Воронежский Митрофане, великий Чудотворче.

Икос 1

Земный Ангеле, небесный человече, вся земная забыв, весь в небесная вперився, еще во плоти сый, уже предстоял еси выну Престолу Славы Божией, ея же красоту ныне лицем к лицу созерцая, подвизаеши ны воспевати тебе:

Радуйся, земное отечество презревый.

Радуйся, небесное наследие получивый.

Радуйся, роду человеческому не приобщавыйся.

Радуйся, Божияго всыновления сподобивыйся.

Радуйся, о земном благородии вознебрегий.

Радуйся, Ангельскому совчинивыйся.

Радуйся, Первопрестольниче Воронежский Митрофане, великий Чудотворче.

Кондак 2

Жития привременнаго суету размышляя, добре уразумел еси, яко преходит образ мира сего, таже вечно пребывающаго взыскуя, отверглся еси мира и яже в нем сладких видением, научи нас, отче, очеса от суеты его отвратити, взывающе Богу: Аллилуйя.

Икос 2

Не можаше древле Авраам пребывати вкупе с присным своим Лотом, аще и любляше онаго, понеже пастуси их сваряхуся между собою, тако и ты, аще и не у возненавидел еси ближних твоих, обаче враждование пути Господня с путем мира сего разсмотряя, добре потщался еси изыти из дому отца твоего и от рода твоего, аще и в полудне жития своего, веровав, яко и последнии будут первыми, сего ради мы, сбытие онаго словесе на тебе видяще, не престанем ти взывающе:

Радуйся, Авраама подражателю, волю свою, яко Лота, в доме отца своего оставивый.

Радуйся, яко от Содома и Гоморры, от дел мира сего избегнувый.

Радуйся, не земная, но горняя возмудрствовавый.

Радуйся, Господа, а не труждающихся мамоне и грехами обремененных, послушавый.

Радуйся, аще и в полудне жития на делание спасения своего изшедый, но с первыми равныя части сподобивыйся.

Радуйся, временное на вечное пременивый.

Радуйся, Первопрестольниче Воронежский Митрофане, великий Чудотворче.

Кондак 3

Избегл еси мира и славы его, но мир тебе искаше, и слава его в след тебе гоняшеся, видевше бо людие жития твоего доброту велию, не у восхотеша, да толик светильник под спудом обретается, подобаше бо тебе, на свещнице поставленну бывшу, горя и светя чистотою жития своего, научати и нас такожде делами воспевати Богу: Аллилуйя.

Икос 3

Сего ради на свещнице преподобнаго Макария Желтоводскаго поставлен быв, часте лицезрением святых мощей его насыщался, умом же Ангелоподобному житию его дивяся, распалился еси множаишим паче прежняго веры пламенем, хотя конечне оному соравнитися, приснопамятующе блаженство алчущих и жаждущих правды, мы же радующеся, яко насытился еси правды Христовы, молимтися: озари и нас светом оныя, вопиющих тебе сице:

Радуйся, алкавый хлеба небеснаго и хлебом нетления насытивыйся.

Радуйся, воды животныя жаждавый и водами чудес всех напаяющий.

Радуйся, мира оставлением мир к себе привлекий.

Радуйся, славы земныя отщетивыйся, ныне же небесною, вкупе же и земною, сияющий.

Радуйся, и под спудом уединения не утаивыйся.

Радуйся, яко поревновав житию преподобнаго Макария Желтоводскаго, ему соравнялся еси.

Радуйся, Первопрестольниче Воронежский Митрофане, великий Чудотворче.

Кондак 4

Молился еси, Святителю отче Митрофане, да поне на свещнице игуменства повелит ти Господь дожещи последний елей жития твоего, но не у изволися тако Ему, уже бо помаза тя десница Его на ин подвиг, Ея же промышлению дивящеся взываем: Аллилуйя.

Икос 4

Хотя же Господь Бог в сосуд избран Духу Своему Святому тя уготовати и славы велия паче иных сподобити, и самое поставление твое в сан Епископа, в нем же просияти подобаше тебе, устрой такожде славно, се бо позорище дивное сотворися видети, яко собором пятинадесяти Архипастырей в сан Епископа рукополагаем был еси, мы же то проречением настоящия твоея славы разумевая, таковаго смотрения о тебе Божияго таинство ублажающе, взываем ти:

Радуйся, малаго искавый и лишшее обретый.

Радуйся, яко и не у хотяй, сподобился еси сана Епископскаго.

Радуйся, яко поставление твое в он бысть позор Ангелом и человеком.

Радуйся, яко пятно десять Архипастырей - аки бы в память и честь пятнодесяти степеней, имиже Матерь Божия вниде во Святая Святых, - рукополагали тя.

Радуйся, яко то бяше, аки бы множайшия будущия твоея по Бозе ревности, и славы, и святыни прообразованием.

Радуйся, яко то славы, ныне тя венчающей, бяше истинным прореканием.

Радуйся, Первопрестольниче Воронежский Митрофане, великий Чудотворче.

Кондак 5

Радостию возрадовася дух мой, Святителю Митрофане, отче наш, зря, яко жениха, исходяща тя из чертога безславия твоего, тако славно уготованнаго претекати, яко исполин, путь Господень, како же не возопию Богу, тако о рабех Своих изволяющему: Аллилуйя.

Икос 5

Дивное воистинну и преславное видение является умным очесем души моея, егда назираю стезие, имиже поведе тя Господь ко имущему последи осенити тя величию, не ли и начало Епископскаго служения твоего такожде чудесно, якоже и врата, имиже введен был еси во оное, се бо едва рукоположен был во Епископа, уже и на соборе противу раскольницев обретаешися, таковаго о тебе смотрения Божияго чудо размышляюще, престанем ли, вопиюще ти, тако взывающе:

Радуйся, дивнаго Промысла Господня любимиче.

Радуйся, яко жених, истекий на престол Епископства.

Радуйся, яко на пути твоем одежда брачная чудес постлася ти под нозе твои.

Радуйся, яко Бог яве чрез то показоваше тя быти исполином Правоверия, яковым же и явился еси воистинну.

Радуйся, яко и ты ратовал еси противу зловерия Никиты распопа.

Радуйся, яко и тебе от Господа венец победы преславныя такожде исплетеся.

Радуйся, Первопрестольниче Воронежский Митрофане, великий Чудотворче.

Кондак 6

Светле востекше на небо Епископства, светлее потекл еси по оному, и не точию ни едино облако заблуждения не омрачи веры твоея, но паче ты, любве Божественныя огнем распален быв, лучами благоверия твоего пламенне изсушал еси блата расколов и неверия, водами погибели затоплявшия паству твою, сего ради сладце вопием Богу, нам тя даровавшему: Аллилуйя.

Икос 6

Аще нареку тя Николаем Мирликийским, аще Иоанном Златоустым, аше Амвросием Медиоланским, аще же и вторым Димитрием Ростовским, ничтоже пререку, о Святителю отче наш Митрофане, всем в ревности по Правоверию уподобився, духом бурным был еси раскольницем и неверующим, яко прах перстный возметая былие басней их лжеучительства, сего ради вопием ти:

Радуйся, солнце Православия, тьму безбожия разгоняющее.

Радуйся, каменю веры, устремлениями ересей не разбиваемый.

Радуйся, громе небесный Силы Господней, силу диаволю сокрушающий.

Радуйся, тьма небесная, огнь нечестия помрачающая.

Радуйся, молние Божественная, противящихся истине поражающая.

Радуйся, глас хлада тонка, обиталище Насадителя веры.

Радуйся, Первопрестольниче Воронежский Митрофане, великий Чудотворче.

Кондак 7

Слава тебе, слава, Святителю отче наш Митрофане, славою Бога Вышняго присно насыщающемуся, ревностию бо поревнова дух твой в житии земном о Господе Вседержителе, научи и ны взывати Ему: Аллилуйя.

Икос 7

Увы мне! Святителю отче Митрофане, воспевати тя дерзнувшему, се бо недоумеваю, что уже более возглаголати; не Илию ли Фесфитянина зрим в тебе, идолы языческих богов опровергающаго, тем же любовию услыши ны, смиренно восклицающих ти:

Радуйся, Бога Единаго проповедниче.

Радуйся, Бога Истиннаго служителю.

Радуйся, и тени многобожия гонителю.

Радуйся, идолов сокрушителю.

Радуйся, Царя Небеснаго верный рабе.

Радуйся, от Него ныне возвеличенный.

Радуйся, Первопрестольниче Воронежский Митрофане, великий Чудотворче.

Кондак 8

Украси тя воистинну добротою всех плодов Духа Своего Святаго, Краснейший паче всех сынов человеческих Господь Иисус Христос, яко служил еси Ему духом и истиною, тем же быв всем вся, да вся приобрящеши Богови, буди и нас научающим, како достойно воспевати Ему: Аллилуия.

Икос 8

Похваляем, Святителю Божий, великое любомудрие твое, научающее нас, како воздавати всем должное, и показующее, яко не точию со страхом и трепетом подобает волю Царей земных исполняти, аще оная воле Божией не противна, но како и всем имуществом нашим служити им подобает, тем же разуму твоему дивящеся, величаем тя:

Радуйся, властем противляющихся обличителю.

Радуйся, властем повиноватися ревностный учителю.

Радуйся, како кесарево кесареви воздавати научивый ны.

Радуйся, Господа, повелевающаго нам быти рабами и слугами всех, аще хотим во Царствии Его первенство получити, послушавый.

Радуйся, Царю земному покорением Бога Небеснаго в теле своем прославивый.

Радуйся, Царем земным своим ублаженный.

Радуйся, Первопрестольниче Воронежский Митрофане, великий Чудотворче.

Кондак 9

Не был еси медию звенящею, ни кимвалом бряцающим, Святителю отче Митрофане, день и ночь поучаясь в законе Господни, но сотворился еси, по словеси Давидову, древом плодоносным, при исходищах вод слезных раскаяния насажденным, произрастил бо еси во время благопотребно во днех жития твоего на земли плоды христианскаго прозябения, от них же и мы насыщающеся, молимтися: настави ны возопити слезами покаяния Богу: Аллилуия.

Икос 9

Христу последуя, имел еси уши и услышал новую заповедь: любите враги ваша, добро творите ненавидящим вас, добре уразумев, яко милости хощет, а не жертвы, никого же от послуживших тебе похулил еси, добр сый, всех добрыми нарицаеши, трудолюбив и рачителен в пользу Церкви Божией, всех таковыми же быти извествуеши, всех прощаеши, прося у всех прощения, нестяжателен сый, молиши, да не истязуют по смерти твоей ни злата, ни сребра, ни меди, их же в персть вменяя, потщался еси еще во днех времяннаго жития в сокровищницы вечныя сокрывати, сего ради и мы, зря, яко весь во Христа облеклся еси, молимтися: научи ны последовати житию твоему, воспевающих тебе:

Радуйся, истый Христу последователю.

Радуйся, возлюбивый враги твоя, добро сотворивый ненавидящим тя.

Радуйся, да и тебе твоя отпустятся, всем коемуждо своя отпустивый прегрешения.

Радуйся, никого же от послуживших тебе ни о чем же похуливый.

Радуйся, ни злата, ни сребра, ни меди при поясе не стяжавый.

Радуйся, во Христа на земли облекавыйся, яко ныне со Христом водворяешися.

Радуйся, Первопрестольниче Воронежский Митрофане, великий Чудотворче.

Кондак 10

Ублажаем тя, Святителю отче Митрофане, яко не точию в совершенную меру исполнения Христова достигл еси, но и телесную меру возраста человеческаго превозшед, осмидесяти бо лет бывши, блаженне уснул еси о Господе, избегше труда и болезни, за тем, по слову Давидову, последовати имевших, такоже преложи тя Бог, видев, яко много потрудился еси, боряся со страстьми, ратуя на враги церковныя, зело бо прилежал еси о спасении вверенных тебе от Господа душ, тем же научи ны, житию твоему последующе, непрестанно возсылати Господу: Аллилуия.

Икос 10

Яково бе житие твое, славою деяний чудесных, аки цветами, испещренное, такова бысть и кончина твоя, ублажая бо тя, Царь, в житии твоем святостию подвигов твоих привязан быв к тебе, поспеши сам ко погребению твоему, и толикою честию почтя тя, яко и святое тело твое изволи нести сам на Царских рамех своих до самыя опочивальницы, последним же лобзанием лобзая тя, не возможе воздержати уст своих, от избытка сердца возглаголавших, яко не остася у него подобнаго тебе святаго старца, како же мы, ныне святыя мощи твоя лобызающе, умолчим восписовати тебе:

Радуйся, в совершенную меру возраста исполнения Христова оболкшийся.

Радуйся, и человеческаго жития в меру совершенную пришедый.

Радуйся, славно в житии подвизавыйся.

Радуйся, славнейшаго погребения сподобивыйся, Царем на рамех до усыпальницы понесенный.

Радуйся, устами Царя земнаго в святости абие свидетельствованный.

Радуйся паче, яко и Небесный Царь нетленною славою осиявает тя ныне.

Радуйся, Первопрестольниче Воронежский Митрофане, великий Чудотворче.

Кондак 11

Добре свершив течение, блаженне уснув о Господе, уже сто тридесять лет царствуеши над тлением, научи и нас, к святым мощем твоим притекающих, над страстьми обладающими нас воцаритися, да поне отныне нерастлением душевным возопием Богу: Аллилуия.

Икос 11

Дивлюся, чту и ублажаю смиренномудренное завещание твое не облекати тя во архиерейския одежды, но положити во схимонашеских, якоже полагахуся и древле телеса святых Архиереев и Алексия, святаго Митрополита и дара чудотворения сподобившагося, не Дух ли Божий Всеведущий твоими устнами аки бы проглаголати изволи настоящее твое прославление, мы же и чудо то, и смирения твоего глубину размышляюще, вопием ти:

Радуйся, глубино смирения.

Радуйся, на верх славы превознесенный.

Радуйся, еще в житии земном Духа Святаго обиталищем сотворивыйся.

Радуйся, точию схимонашеских одежд желавый.

Радуйся, Митрополиту Алексию подражавый и тогожде дара чудотворений сподобивыйся.

Радуйся, точию малыя отрады душе твоей желавый и ныне радостию неизреченною насыщаемый.

Радуйся, Первопрестольниче Воронежский Митрофане, великий Чудотворче.

Кондак 12

Оставил еси телом паству твою, душею же никогда не изволял отлучатися оныя, выну о спасении ея моляся ко Господу, ныне же изнесенным бывшим мощем твоим из усыпальницы и явлениями твоими мнозем верующим то извествуеши, мы же, за твое о нас промышление тебе благодарствующе, молимтися: научи ны всегда возсылати за то Господеви: Аллилуия.

Икос 12

Мнозем являлся еси во снех и видениих, Святителю отче наш Митрофане, иных ко исканию от тебе помощи возбуждая, иным же некия тайны, яковии тебе изволяхуся, открывая, иным же и язык на время связуя, подобно Архангелу Гавриилу, Престолу Вышняго предстоящему; приводиши ны в недоумение, киим измерением славу твою измерити, сего ради смиренно молим тя, помяни ны в молитвах твоих, усердно вопиющих тебе:

Радуйся, Вертограда небеснаго жителю.

Радуйся, Эдема пренебеснаго наследниче.

Радуйся, Иерусалима Горняго гражданине.

Радуйся, паче солнца славою немерцающею осияваемый.

Радуйся, Гавриила подражателю, радость спасения, и времяннаго, и вечнаго всем прибегающим к тебе благовествующий присно и неотложно вскоре подавающий.

Радуйся, яко радость твоя во веки от тебе не отъимется.

Радуйся, Первопрестольниче Воронежский Митрофане, великий Чудотворче.

Кондак 13

Малаго сего моления нашего, о Угодниче Божий, якоже двух лепт вдовичих не презри, молися ко Господу, да здравие и живот телесем, паче же душам нашим подаст, на Страшнем же Судити Своем одесную Себе стати сподобит, да во оном некончаемом веце и мы с тобою улучим непрестанно воспевати Ему: Аллилуия.

Сей Кондак читается трижды, затем Икос 1 и Кондак 1.

Молитва святителю Митрофану Воронежскому

О святый Угодниче Божий, Первопрестольниче и великий Чудотворче Воронежский Митрофане! О чем помолимся к тебе, и проповеднику покаяния нашего, и свидетелю, яко не у отвратися еще от нас десница Божия, готовая помиловати ны, о чемжде помолимся тебе, о Угодниче Божий! и неусыпный о нас к Нему ходатаю, не вемы, аще дух, ходатайствуяй за ны воздыханьми неизглаголанными, не наставит ны.

О чемжде помолимся? увы нам! увы нам, отвсюду бо сретоша нас злая, телесне болезни сляцают, душевне бури страстей погубляют, одесную мир, глаголяй: благоже, благоже, истощайте их до оснований, ошуию диавол, яко лев рыкаяй, некий поглотити ны. О тесноты! о скорби! камо убежим, душе моя, камо скрыемся от толиких бед? Аще взыдем на небо, тамо Бог, Ему же не веровахом, Его же онеправдовахом; аще снидем во ад, тамо муки вечныя, имже аще и не веруем, но, огня их мысленно касающеся, трепещем; аще бо вселимся в последних моря, но, увы нам, и тамо правосудная рука Его обрящет ны, и карающая десница Его излиет на главы наша фиал ярости небесныя! К кому же прибегнем мы, в таковей беде сущии? аще не к тебе, Пастырю доброму, не точию в житии земном душу свою за паству полагавшему, но и ныне не престающему, телом зде пребывая, духом же Пресвятей Троице предстоя, спасение наше строити, тебе бо дадеся от Господа благодать молитися за ны. Ты бо и во днех жития твоего и творил, и учил вверенную тебе паству ходити во всех заповедех Господних безпорочно. Помози же нам ныне, да вся стропотная наша в пути гладкая обратятся, царствующие же грады, град сей, храм сей и всех, в православной вере сущих, во всяком благоденствии, любви, мире и тишине всегда сохраняй, ко Господу же молися, да огнем любви Своея Божественныя распалит горящий угль ревности по Бозе в сердце Благовернейшаго Императора нашего Николая Павловича, Им же Самим священнотайне, яко в сердце помазанника Своего вложенный в Него, да возсияет Он нам обновителем попраннаго нечестиями нашими благоверия святых праотцев наших, да тако Имя Его, в книгу живота вечнаго вписанное, и на земли паче прежняго превознесется, и на небесех во веки веков восхвалится, о нас же молися, да всем сердцем, глубины нечестия нашего ужасившеся, обратимся всею душею ко древнему христианскому благочестию и поне отныне приложим Благочестивейшему Государю нашему в боголюбезном сем подвизе всеми силами помоществовати, да тако от вечныя погибели избавившеся, и земное отечество наше превыше всех царств вознесем, Ему же вси Царие земстии поклонятся, зане Царя Царствующих позна и возлюбив, приложися Ему в Небесном же, некончаемом, присно взыскуемом Царствии Божии, да удостоимся и мы с тобою выну насыщатися Славою Господа и Бога и Спаса нашего Иисуса Христа, Ему же со Безначальным Его Огнем и Всесвятым и Благим и Животворящим Его Духом, вкупе и со Пречистою и Преблагословенною Владычицею нашею Приснодевою Мариею Богородицею, Единою по Бозе Всемогущею, буди всякая слава, честь, и держава, и поклонение от всех родов земных, и небесных, и преисподних во веки веков. Аминь.

 

 
Читать другие акафисты раздела "Православные акафисты"
 

Миссионерско-апологетический проект "К Истине"

Читайте также:



© Миссионерско-апологетический проект "К Истине", 2004 - 2016

При использовании наших оригинальных материалов просим указывать ссылку:
Миссионерско-апологетический проект "К Истине" - www.k-иstиne.ru