Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист святителю Иннокентию Херсонскому


Православные акафисты

Акафист второй святителю Иннокентию Херсонскому

Кондак 1

Избранниче возлюбленный Божия Матери, Святителю преславный и великий чудотворче, богомудре отче наш Иннокентие,прославляюще прославшаго тя Господа, пение похвальное ти дерзаем приносити. Ты же, яко великих дарований сподобивыйся, приими молитвы и моления чад твоих, любовию ти присно взывающих:

Радуйся, отче наш Иннокентие, святителю преславный и богомудрый.

Икос 1

Ангельския уста по достоянию возмогут воспети тя, Иннокентие преславне отче наш, мы же, земнороднии како дерзнем ти похвалу приносити. Обаче любовию побеждаеми, со благоговением ти глаголем:

Радуйся, пастырю наш добрый.

Радуйся, отче милостивый и кроткий.

Радуйся, правило веры и благочестия.

Радуйся, образе святости и смирения.

Радуйся, Святыя Троицы пречистое селение.

Радуйся, ангельскаго жития уподобление.

Радуйся, всесветлое благодати приятелище.

Радуйся, земли нашея чудное сокровище.

Радуйся, отче наш Иннокентие, святителю преславный и богомудрый.

Кондак 2

Видяще родители твоя благочестивыя велия дарования Господня, на тебе, святе отче, обильно почившия, и проразумевающе тя быти служителя дивнаго Церкви Христовыя, возрадовашася духом и всех благих Подателю Богу воспеша: Аллилуиа.

Икос 2

Разум Божественый взыскуя от юности твоея, возлюбил еси стези Премудрости и путие Заповедей Господних, на нихже сердце твое право утвердивши, многим образ праведнаго жития и благочестия был еси. Темже со благоговением глаголем ти сице:

Радуйся, святое прозябение корене благочестиваго.

Радуйся, дивный цвете вертограда благоуханнаго.

Радуйся, праведных родителей отрасль пречестная.

Радуйся, лозы многоплодныя розго богоизбраная.

Радуйся, от юности во благочестии воспитанный.

Радуйся, на путь доброделания измлада наставленый.

Радуйся, богослужение всем сердцем возлюбивый.

Радуйся, райскую сладость в молитве предвкусивый.

Радуйся отче наш Иннокентие, святителю преславный и богомудрый.

Кондак 3

Силою свыше препоясани быша чресла ума твоего, отче всеблаженне, егда востекл еси на путь многотрудный учения, хотяще воистину сыном Премудрости явитися и Учителя Божественнаго последователем быти. Благодатию же Божиею в подвизе сем добре преуспевающе, Господу, ти присно поспешествующу, воспевал еси: Аллилуиа.

Икос 3

Имуше богатство дарований, излиянных на тя обильно от щедрот Господних, яко раб благий и верный преумножил еси богоданныя таланты, да явишися неленостный и всеусердный делатель Вертограда Божия. Сего ради, прославляюще тя, премудрости сокровище неисчерпаемое, вопием ти сице:

Радуйся, Божиих дарований исполненый.

Радуйся, благодатию  Господнею осененный.

Радуйся, суемудрие отринувый.

Радуйся, богомудрие возлюбивый.

Радуйся, небеснаго знания возжелавый.

Радуйся, божественныя мудрости взыскавый.

Радуйся, богословов древних учениче прехвальный.

Радуйся, вселенских учителей последователю усердный.

Радуйся, отче наш Иннокентие, святителю преславный и богомудрый.

Кондак 4

Бурею искушений волнуемое и соблазнов море жития мирскаго не прельстиша тя,отче всеблаженне Иннокентие. Оставивше бо ризы кожанныя тли века сего, равноангельскаго жития взыскующе,  во одежду многосветлую чина монашескаго облеклся еси да выну Господу зовеши: Аллилуа

Икос 4

Слышати потшался еси сердцем твоим ангельския гласы неизреченныя, Павлу небошественному ревнуя, ихже не леть есть глаголати усты земнородными, вперил еси ум твой вышним,  и ангельски пожив на земли, на высоту бестрастия возшел еси, да с лики небесными песнь Творцу всяческих воспоеши. Темже приими от нас похвалы сия:

Радуйся, ангельских ликов собеседниче.

Радуйся, иноческих соборов наставниче.

Радуйся, путь тесный жития монашескаго избравый.

Радуйся, вся красная мира сего во уметы вменивый.

Радуйся, плотския страсти поправый.

Радуйся, добродетельми душу свою украсивый.

Радуйся, бронею правды облеченый.

Радуйся, венцем целомудрия увенчаннный.

Радуйся, отче наш Иннокентие, святителю преславный и богомудрый.

Кондак 5

Божественным светом несозданным осияна быша душа твоя, отче всеблаженне, егда на Фаворскую гору молитвы сердечныя восхождение подъял еси, апостолом избраным последствуя, и сподобился еси умными очесы славу превечную Господа твоего Творца зрети и сладость вкусити богопредстояния, радостию взывающе: Аллилуиа.

Икос 5

Видев Сердцевидец Господь тя, отче наш Иннокентие, всяческих добродетелей исполненна, яко преславный светильник на свещнице высокой служения архипастырскаго постави тя, да сияеши ученьми твоими всем в Дому Божии сущим. Людие же правосланиии, зряще тя пастыря добраго и отца милостиваго, со умилением взываху ти:

Радуйся, святителю наш богоизбранный.

Радуйся, архипастырю богодарованный.

Радуйся, апостольских престолов сонаследниче.

Радуйся, отеческих соборов сотаиниче.

Радуйся, благое иго Христово на рамена своя подъявый.

Радуйся, святительского служения крест от Господа приявый.

Радуйся, яко тобою истина возвещается.

Радуйся , яко тобою всякая лесть отгоняется.

Радуйся, отче наш Иннокентие, святителю преславный и богомудрый.

***

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедник Евангелия вечнаго воистину явился еси неленностный, делателю непостыдный, право правящий слово Истины, Иннокентие отче наш. Огненными бо твоими словесы, ревностию по Бозе Вседержители распаленными, возжегл еси пламя любве и веры в сердцах паствы твоея, поучая всех непрестанно Господу взывати: Аллилуиа.

Икос 6

Возсиял еси яко светило многосветлое, небо Церкве Русския лучами животочными исполняющее и верных души освещяюшее, денно бо и нощно неустанно трудился еси, о пользе духовней паствы твоея непрестанно помышляюще, сего ради сице тя воспеваху чада твоя:

Радуйся, спасения многих взыскавый.

Радуйся, вся любовию объявый.

Радуйся, крепкое падающих возведение.

Радуйся, право стоящим утверждение.

Радуйся, Архиерея вечнаго служителю всеусердный.

Радуйся, Небеснаго Домовладыки рабе благий и верный.

Радуйся, жатвы Господней делателю неленостный.

Радуйся, о людех православных молитвенниче предивный.

Радуйся, отче наш Иннокентие, святителю преславный и богомудрый.

Кондак 7

Хотением восхотел еси Града Вечнаго достигнути, емуже Художник и Создатель Бог, и посреде мира сего жительствуя, отбежал еси тленныя суеты земныя, отложще всякое многопопечение вселукавое и покаянием убелил еси ризы своя, да внидеши в Небесный Чертог Господа Твоего, радостию поюще: Аллилуиа.

Икос 7

Новаго тя Моисея амаликоборца яви пастве твоей Господь, в молитве пламенней руце своя преподобныя воздевающаго и мечем веры дерзость вражескую побеждающаго и град Одессу от погибели избавляющаго предстательством своим. Темже, избегше напастей лютых, песнь ти приносим похвальную:

Радуйся, преславное наше избавление.

Радуйся, вражеския злобы посрамление.

Радуйся, всесветлое Одессы похваление.

Радуйся, всея земли нашея заступление.

Радуйся, Отечества земнаго верный сыне.

Радуйся, Небеснаго Иерусалима преславный гражданине.

Радуйся, Взбранной Воеводы верный служителю.

Радуйся, небесных  чинов сожителю.

Радуйся, отче наш Иннокентие, святителю преславный и богомудрый.

Кондак 8

Странная суемудрствующим мудрецам века сего и всечудная тебе, отче святый, явленна бысть премудрость воистину небесная, зане всем житием твоим Премудрости  Ипостастной служити восхотел еси и Тоя стязям невозвратно последовал еси, радостию взывающе: Аллилуиа

Икос 8

Весь всем воистину вся был еси, отче Иннокентие, да некия паки Господу приобрящеши и ко Христовой Церкви приведеши. Сего ради труды и подвиги твоими Церковь похваляется светло и людие православнии, милостиваго тя святителя песньми ублажают:

Радуйся, Церкве Хистовыя столпе непоколебимый.

Радуйся, Православия светильниче неугосимый.

Радуйся, златокованная трубо богословия.

Радуйся, неутомимый проповедниче спасения.

Радуйся, души наша Словом Божиим просветивый.

Радуйся, сердца наша питием благочестия напоивый.

Радуйся, неисчерпаемый премудрости источниче.

Радуйся, Вечнаго Евангелия всехвальный благовестниче.

Радуйся, отче наш Иннокентие, святителю преславный и богомудрый.

Кондак 9

Всякия добродетели вместилище всечестное явился еси, отче богомудре Иннокентие, образ являюще жития праведнаго и всечестнаго, да подвигом твоим последствуя, сподобимся с тобою песнь неосужденно взывати Богу: Аллилуиа.

Икос 9

Витийствовати всеизрядно не от человек научен был еси, отче всечестне, земли нашея новый Златоусте, но Духом Божественным просвещен, якоже и иногда святии Божии человецы, показал еси нам путь ко Господу, Сего ради сице вопием ти:

Радуйся, путь ко спасению нам возвестивый.

Радуйся, многия ко Христу возвративый.

Радуйся, яко тобою Евангелие прияхом.

Радуйся, яко тобою истины веры познахом.

Радуйся, всесветлое лести попрание.

Радуйся, всемощное ересей посрамление.

Радуйся, неверия грозный обличителю.

Радуйся, Тайн Божиих верный служителю.

Радуйся, отче наш Иннокентие, святителю преславный и богомудрый.

Кондак 10

Спасения нашего врага, человекоубийцы диавола немощныя дерзости  посрамлены о тебе быша, отче Иннокентие, жезлом бо твоим святительским волки душевредныя далече от стада церковнаго отгнал еси, да чада, яже ти Господь подаде с тобою песнь победную поют: Аллилуиа.

Икос 10

Стеною молитв твоих, отче преславне, ограждены есмы от всякаго всегубительнаго прилога вражия, сего ради, тобою нам чудеса явленныя поминающе похвалы тя достодолжно ублажаем:

Радуйся, вселукавых духов прогонителю.

Радуйся, козней диавольских победителю.

Радуйся, яко тобою от напастей избавляемся.

Радуйся, яко тобою благодати сподобляемся.

Радуйся, яко предстательством твоим жизнь вечная обретается.

Радуйся, яко молитвами твоими вера истинная познавается.

Радуйся, многия от смерти лютыя свободивый.

Радуйся, от греховных язв ны исцеливый.

Радуйся, отче наш Иннокентие, святителю преславный и богомудрый.

Кондак 11

Пение боголепное уст твоих, песнотворче изрядный, приял есть Господь Вседержитель, аще и песнословят Его тысячи Ангелов и тмы бесчисленныя умных сил небесных, с ними же ныне молися мир подати всем, верою зовущим: Аллилуиа.

Икос 11

Светозарное Правды Солнце Христос Бог наш сущим во тме греховней дивное светило великое яви тя , отче всеблаженне, светом благодати Божия сияющее и путь доброделания всем освещающее, сего ради молимся: просвети сердца наша, страстьми омраченныя, да сподобимся пети ти:

Радуйся, Светом Невечерним озаренный.

Радуйся, Славою Божией просвещенный.

Радуйся, мглы неверия отгонителю.

Радуйся, лживыя неправды потребителю.

Радуйся, Радуйся всякия правды исполненый.

Радуйся, добродетельми светло преукрашенный.

Радуйся, любовию твоею всему миру возсиявый.

Радуйся, добродетельным  житием вся облиставый.

Радуйся, отче наш Иннокентие, святителю преславный и богомудрый.

Кондак 12

Благодати источниче приснотекущий, воды животочныя кладезю неисчерпаемый, преславне отче и всеблаженне, благодать нам у Господа испроси, да стопам твоим последствуя, сподобимся с тобою и со всеми святыми в невечернем дни Царствия Христова воспевати: Аллилуиа.

Икос 12

Поюще Бога, дивнаго во святых Своих, похвалы всяческая приносим ти, отче наш Иннокентие, молитвенниче о нас усердный и заступниче наш всечудный, и единым сердцем величаем тя, глаголюще:

Радуйся, причастниче вечныя радости.

Радуйся, приятелище божественныя сладости.

Радуйся, преславное верных величание.

Радуйся, православных крепкое упование.

Радуйся, ангельское житие явивый.

Радуйся, проповедию мир просветивый.

Радуйся, правды дивное благоухание.

Радуйся, святости чудное сияние.

Радуйся, отче наш Иннокентие, святителю преславный и богомудрый.

Кондак 13

О предивный угодниче Христов, Святителю отче Иннокентие, приими немощное пение сие от любви нашея возсылаемое ти, и Моли Господа и Владыку всяческих избавити нас душевреднаго прилога вражиего, да спасение вечное улучивше, песнь с тобою боголепно воспоим: Аллилуиа, аллилуиа, аллилуиа.

Сей Кондак читается трижды, затем Икос 1 и Кондак 1.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru