Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

ГлавнаяО проектеО центреВаши вопросыРекомендуемНа злобу дняБиблиотека • Новые публикации • Поиск


  Читайте нас:
 Читайте нас в социальных сетях
• Поиск
• Карта сайта
• RSS-рассылка
• Новые статьи
• Фильмы

• Это наша вера
• Каноны Церкви
• Догматика
• Благочестие

• Апологетика
• Наши святые
• Миссия

• Молитвослов
• Акафисты
• Календарь
• О посте

• Мы - русские!
• ОПК в школе
• Чтения
• Храмы

• Нравственность
• Психология
• Добрая семья
• Педагогика
• Демография

• Патриотизм
• Безопасность

• Общее дело
• Вакцинация

• Атеизм

• Буддизм
• Индуизм
• Карма
• Йога
• Язычество

• Иудаизм
• Ислам
• Католичество
• Протестантизм
• Лжеверие

• Секты
• Психокульты
• Оккультизм
• Лженаука
• Гомеопатия
• Астрология

• MLM

• Аборты
• Ювенальщина
• Содом ныне
• Наркомания
• Самоубийство

Просим Вас о помощи нашему проекту:

WebMoney:
R179382002435
Е204971180901
Z380407869706

Яндекс.Деньги:
41001796433953

Карта Сбербанка:
4276 8802 5366
8952

Православные акафисты / Акафист святителю Иннокентию Херсонскому


Православные акафисты

Акафист первый святителю Иннокентию Херсонскому

Кондак 1

Избранный от Господа благий рабе и верный, Церкви Православныя украшение, новый Златоусте, Христова стада пастырю предобрый, святителю Иннокентие, от любве душевныя ублажаем тя, заступника и покровителя града нашего. Темже теплыми твоими молитвами у Престола Пресвятыя Троицы укрепляеми, благодарно зовем ти:

Радуйся, богомудре отче Иннокентие, святителю преславный.

Икос 1

Ангела Хранителя земли нашея яви тя милосердный Господь, святителю отче Иннокентие, в семье бо боголюбивей возрастился еси, великий светильниче Церкви Христовой, от юности любовь ко храму Божию имея и от земных к небесным восходя, достойный служитель велений Отца Небеснаго явился еси. Мы же, грешнии, с любовию вопием ти:

Радуйся, от корене благочестиваго рожденный.

Радуйся, от рождения своего омофором Царицы Небесныя покровенный.

Радуйся, родителей твоих сыне богодарованный.

Радуйся, во святей вере Православней строго воспитанный.

Радуйся, в духовном просвещении разум книжный стяжавый.

Радуйся, чистое сердце твое Господеви отдавый.

Радуйся, во граде Киеве книжной мудрости наученный.

Радуйся, смирением и молитвою от страсти уныния сохраненный.

Радуйся, богомудре отче Иннокентие, святителю преславный.

Кондак 2

Видев Господь сердце твое, отче Иннокентие, любовию к Нему пламенеющее, призва тя на стезю монашескаго жития, обаче не в тишине келии уединенныя, но посреде мира, якоже воин посреде сечи ратныя. Темже разум истиннаго богословия стяжав, богомудрыми ученьми утверждал еси ученики твоя и Службе Божией зело прилежал еси, Ангельскую песнь воспевая Господеви: Аллилуиа.

Икос 2

Разум богопросвещен свыше тебе даровася, святителю предивный, егда, еще отрок сый, дух твой к приятию Божественныя истины уготовал еси, не токмо слушая, но и исполняя слово Божие. Аще убо во всем подражатель Христу был еси, в том же разуме настави и нас, зовущих ти:

Радуйся, чистоты душевныя и телесныя усердный хранителю.

Радуйся, заповедей Божиих верный исполнителю.

Радуйся, чтение Божественных Писаний измлада возлюбивый.

Радуйся, во дни и в нощи непрестанно молитвы к Богу возносивый.

Радуйся, древу, насажденному при исходищах вод, уподобивыйся.

Радуйся, девством и целомудрием всеизрядне украсивыйся.

Радуйся, всего себе воле Божией предавый.

Радуйся, токмо от Господа помощи и утешения искавый.

Радуйся, богомудре отче Иннокентие, святителю преславный.

Кондак 3

Силу духа твоего во едино намерение совокупивый, отче Иннокентие, возжелал еси житие твое безраздельне на служение Церкви Христовой предати. Сего ради по стопам Христа путем узким последовал еси, ревностно труждаяся в писаниих церковных, непрестанно Ему воспевая: Аллилуиа.

Икос 3

Имея всегда пред очима твоима Господа, весь Ему верен был еси, Иннокентие преславне, темже на степень священства архиерей Божий возведе тя. Ты же со всяким смиренномудрием на рамо свое служение во граде Киеве подъял еси, тако и нас подвизаеши взывати тебе сице:

Радуйся, писаньми твоими богодухновенными души и сердца всех чтущих тя просветивый.

Радуйся, подвиги и труды подвижников Христовых в творениих твоих изобразивый.

Радуйся, яко и в житии твоем всецело им последовал еси.

Радуйся, яко обитель Киево-Братскую строениями украсил еси.

Радуйся, тобою бо догматы утверждаются.

Радуйся, светильниче веры, на свещнице церковней возжженный.

Радуйся, угодниче Божий, смирением и кротостию паче всех дарований украшенный.

Радуйся, богомудре отче Иннокентие, святителю преславный.

Кондак 4

Бури страстей избежав, архипастырски усердно трудился еси, святителю отче Иннокентие, и сокровище премудрости ревностно собирати тщася ко просвещению народов Отечествия твоего, научил еси всех разумно пети Богови: Аллилуиа.

Икос 4

Слышавше и видевше, святе Иннокентие, ближнии и дальнии души твоея доброту, дивляхуся о трудех твоих неустанных, имиже трудился еси во святительстем сане на земли Вологодстей и Харьковстей. Темже людие Божии радовахуся, яко приял еси жезл архипастырский; мы же, светом твоего богоразумия озаряеми, вопием ти:

Радуйся, благочиния церковнаго верный блюстителю.

Радуйся, богослужебных уставов строгий исполнителю.

Радуйся, храмов святых искусный устроителю.

Радуйся, честных обителей усердный зиждителю.

Радуйся, пастырства добраго ревностный попечителю.

Радуйся, соблазнов, ересей и нестроений мудрый искоренителю.

Радуйся, яко словесы твоими духовне алчущих питаеши.

Радуйся, яко учении твоими духовне жаждущих напаяеши.

Радуйся, богомудре отче Иннокентие, святителю преславный.

Кондак 5

Боготочный источник премудрости, добродетелей духовных исполненный, явился еси, Иннокентие прехвальне, сего ради избра тя Господь, яко угодника Своего возлюбленнаго, просвещения ради народа православнаго, темже богодухновенными писаньми твоими усердно Церкви Христовой послужил еси. Мы же, хвалу возсылающе ко благодеющему тебе Богу, вопием: Аллилуиа.

Икос 5

Видевше тя вернии людие, яко помощника и утешителя не токмо к тебе приходящим, но и далече сущим, яко писании твоими к покаянию призывая, вся утешаеши, вразумляеши и теплым твоим ходатайством заступаеши. Мы же, грешнии, вопием ти:

Радуйся, яко дарования Божия, данныя ти, приумножил еси.

Радуйся, словесы твоими души многия просветил еси.

Радуйся, яко свет богопознания в сердца чтущих тя изливаеши.

Радуйся, яко чистоту души в них добре насаждаеши.

Радуйся, устнами медоточными глаголы живота вечнаго от Бога возвещающий.

Радуйся, от Духа Свята просвещенный и нас просвещающий.

Радуйся, гусли духа сладкозвучныя, величие Божественных Страстей Христовых боголепно воспевый.

Радуйся, Архистратига Сил Небесных Михаила с любовию велемудро прославивый.

Радуйся, богомудре отче Иннокентие, святителю преславный.

Кондак 6

Проповедник веры Православныя и ревнитель благочестия был еси, святителю отче Иннокентие, заповеди Господни не усты токмо, но и житием твоим изъяснивый, и тако просветися свет твой пред человеки, яко тии, видяще добрая дела твоя, прославляют Отца Небеснаго, вопия Ему: Аллилуия.

Икос 6

Возсиял еси, святителю Иннокентие, яко звезда лучезарная Церкви Христовой ревностию твоею о славе Божией, егда Пастыреначальник Христос Бог постави тя светильника пастве Тавричестей, да светиши светло Отечеству твоему. Мы же, дивному промышлению Божию о тебе радуяся, умильно поем ти:

Радуйся, в день Пресвятыя Троицы начало служения твоего в земли Тавричестей положивый.

Радуйся, благовествованием верных радостно освятивый.

Радуйся, богоспасаемаго града нашего о Господе заступление.

Радуйся, всего края южнаго честная похвало.

Радуйся, архиерею Божий, святителю предивный.

Радуйся, Духа Святаго жилище преукрашенное.

Радуйся, Пресвятыя Троицы служителю верный.

Радуйся, телом немощный, духом же благодатиею Божиею укрепленный.

Радуйся, богомудре отче Иннокентие, святителю преславный.

Кондак 7

Хотя Всевидец Господь прославити тя, архиерее преславне, воздвиже тя пастве твоей неусыпна делателя и молитвенника на ниве неоранней земли Причерноморския. Темже изначала в строении соборныя церкви Преображения во граде Одессе неустанно трудился еси, в нейже молитвы теплыя ко Христу Богу и Пречистей Его Матери возносил еси, с веселием воспевая: Аллилуиа.

Икос 7

Новаго избранника Божия видеша тя православнии людие, добраго пастыря Христова и молитвенника теплаго: ты бо память священномучеником Херсонесским соборне праздновати повелел еси, ихже Господь прослави яко угодники Своя. Мы же, чудящеся таковей неизреченней благости Божией, умильно взываем ти сице:

Радуйся, деяния первых святителей юга Руси достойно прославивый.

Радуйся, яко купно с сими святыми ныне и от нас славословие приемлеши.

Радуйся, крестныя ходы с чудотворною иконою Касперовскою установивый.

Радуйся, храмов Божиих основателю.

Радуйся, благолепия церковнаго ревностный устроителю.

Радуйся, делания духовнаго рачителю.

Радуйся, в трудех и болезнех явивый силы Божия вместилище.

Радуйся, сосуде освященный, Духа Святаго хранилище.

Радуйся, богомудре отче Иннокентие, святителю преславный.

Кондак 8

Странное и неизреченное чудо благодати небесныя явился еси, Иннокентие досточудне, проповеднику покаяния великому святителю Иоанну Златоустому, воистину, уподобляяся: ты бо светом Евангелия Христова и учением твоим сладкодухновенным боголюбивую паству твою просвещал и научал еси, да любовь святая утвердится в сердцах христианских, во еже ни скорбь, ниже теснота, ниже самая смерть не возмогут разлучити верныя от любве Божия. Темже и нас, грешных, воздвизаеши непрестанно служити Господу сил и воспевати Ему с любовию: Аллилуиа.

Икос 8

Весь освящен благодатию Духа Святаго, иго Христово на рамо взем, вспять николиже обративыйся, мудрым предстоятелем и добрым благоукрасителем обителей святых был еси, себе самаго иноческим житием украшая, уставы отеческия во обителех крепко водворял еси. Темже, похваляюще святую ревность твою о Господе, зовем ти:

Радуйся, путь тесный жития монашескаго от юности возлюбивый.

Радуйся, во смирении твоем высокая дарования получивый.

Радуйся, яко светильники молитвенныя обителей святых в земли Тавричестей возжегл еси.

Радуйся, яко мног собор иночествующих тамо собрал еси.

Радуйся, благословение апостола святаго Первозваннаго Андрея наследивый.

Радуйся, продолжателю трудов славных того апостола дивный.

Радуйся, вертограда духовнаго в земли Тавричестей мудрый окормителю.

Радуйся, всем притекающим в вертоград сей попечителю и покровителю.

Радуйся, богомудре отче Иннокентие, святителю преславный.

Кондак 9

Всем сердцем возлюбивый Бога, всечудне святителю, Спаса Христа умоляеши за град твой и люди твоя. Сие показал еси яве во дни обстояния вражескаго, проповедниче ревностный и пламенный, утверждая стадо свое во уповании на помощь Божию, да непоколебими пребудут от нападения иноплеменников. И яко предрекл еси, да отступит сила вражия от брегов земли Одесския, тако и бысть исполнено вскоре. Темже людие православнии прославляху доблесть твою и вопияху Богу: Аллилуиа.

Икос 9

Ветий человеческих благохваление не довлеет к достойному прославлению многих подвигов твоих, святителю славне. Имея бо велию святительства благодать, сподобился еси, отче Иннокентие, икону святую Пречистыя Богоматере, в селении Касперовстем чудесне явленную, прославити по достоянию. Темже подвизаеши нас взывати тебе сице:

Радуйся, славы Царицы Небесныя умиленный песнотворче.

Радуйся, пред Нею о пастве твоей теплый молитвенниче.

Радуйся, быти Покровом и Заступницею края южнаго земли нашея Пречистую умоливый.

Радуйся, о утверждении Церкви Православныя пред Богородицею многия слезы проливый.

Радуйся, яко в годину лютую в вере непоколебимей стадо твое укрепил еси.

Радуйся, яко во уповании на милость Божию люди верныя утвердил еси.

Радуйся, в любви ко Отечеству земному преподобному Сергию Радонежскому поревновавый.

Радуйся, безстрашием ко врагом Отечества священномученику Патриарху Ермогену уподобивыйся.

Радуйся, богомудре отче Иннокентие, святителю преславный.

Кондак 10

Спасти хотя богоспасаемый град Одессу от нашествия вражия, святителю добльственне, предстал еси купно с паствою твоею пред Касперовским образом Взбранныя Воеводы, вознося святыя молитвы, да покрыет Пречистая от всякаго зла люди Своя честным Своим омофором. Темже град сей спасен бысть, и бежаша вспять сила вражия. Тако моли Царицу Небесную даровати и нам помощь, покров и защиту, да сподобимся с тобою пети Богу: Аллилуиа.

Икос 10

Стена необоримая Церкви Христовой был еси, отче наш Иннокентие, еюже Отечество наше оградися, в Православии утвердися и от врагов спасеся. И ныне светом твоим тьма отгоняется и обнажается плетение лукаваго совета божественныя твоея мудрости сиянием, да вси взываем ти:

Радуйся, добрый пастырю и великий заступниче народа, горем отягченнаго.

Радуйся, святою ревностию пламеневый о спасении Крыма осажденнаго.

Радуйся, воинство на освобождение градов и весей от нечестивых врагов благословивый.

Радуйся, яко собою Отечеству пастыря добра, полагающа живот свой за овцы своя, явивый.

Радуйся, поля ратныя без страха посещая, ураненых воинов духом и любовию своею укрепивый.

Радуйся, яко тамо, идеже смерть и огнь быша, безстрашно проходивый.

Радуйся, бедствующий град предстательству Божию вручивый.

Радуйся, всех верою и упованием на Господа воодушевивый.

Радуйся, богомудре отче Иннокентие, святителю преславный.

Кондак 11

Пение всеумиленное приносил еси Пресвятей Троице во вся дни земнаго жития твоего, Иннокентие всехвальне, Царя Небеснаго Христа Бога рабе верный; сего ради в день Пресвятыя Троицы дарова тебе Вседержитель Господь кончину мирну и прослави тя на Небесех. Ныне же молися о нас, чтущих светлую память твою, да купно с тобою воспоем Господеви: Аллилуия.

Икос 11

Светлыми лучами чудес твоих, святителю Божий, всех верных сердца и по кончине твоей просвещаеши: благочестно бо житие свое скончав, ревнителем Православия и стеною необоримою людем избранным ныне являешися. Мы же, грешнии, заступления молитвеннаго твоего просяще, с верою и любовию прославляем тя благохвалении сими:

Радуйся, Превечнаго Архиерея Христа верный святителю.

Радуйся, Пресвятыя Богородицы вседоблий служителю.

Радуйся, яко молитвами твоими град наш ограждаеши.

Радуйся, яко предстательством твоим на небесех верныя от всякого зла соблюдаеши.

Радуйся, пение акафистово ко Причащению Святому составивый, сам пред кончиною своею Святых Таин Христовых причастился еси.

Радуйся, Воскресение Христово преславне воспевый, сам и ныне лицезрения Господа сподобился еси.

Радуйся, благоволением Пресвятыя Троицы освященный.

Радуйся, с девственными лики, покланяющимися всех Творцу Вседержителю, сопричтенный.

Радуйся, богомудре отче Иннокентие, святителю преславный.

Кондак 12

Благодати Божией знамение непререкаемое яви нам Христос в обретении мощей твоих, егда благоуханием, исходившим от гроба твоего, прослави тя. Сего ради священнии и иночестии собори, и мирстии людие воспевают и прославляют тя на месте, идеже почивают святыя мощи твоя, источающия исцеления струи и страсти потопляющия, верныя же сердца орошающия благодатию Господнею, Богу же, дивному во святых Своих, иже дарованием чудес обогати тя, со умилением вопиют: Аллилуиа.

Икос 12

Поюще твое прославление, святителю Иннокентие, умиленно припадаем пред честными мощами твоими, благодарственно воспоминая труды и подвиги твоя; и ныне услыши молитвы чтущих тя и из глубины сердечныя взывающих:

Радуйся, архиереев доброто, священников и иноков похвало.

Радуйся, града нашего утверждение и славо.

Радуйся, верно молящимся тебе на помощь скоро притекающий.

Радуйся, сердцам скорбящим утешение и радость подающий.

Радуйся, Пресвятыя Владычицы Богородицы всеусердный почитателю.

Радуйся, проповедниче сладкоглаголивый, апостолом Христовым подражателю.

Радуйся, славно совершивый путь, Господом веденный.

Радуйся, в чертозе Небеснем к лику святых сопричтенный.

Радуйся, богомудре отче Иннокентие, святителю преславный.

Кондак 13

О богоносне и преславне угодниче Христов святителю Иннокентие! Вонми гласу моления нас, грешных, от сокрушеннаго сердца к тебе возносиму, испроси у милостиваго Бога прощение прегрешений наших, да дарует мир жительству нашему, Церковь Свою от всякия вражды, нестроений, ересей и расколов да оградит, возрастит и укрепит ю, вся же верныя ко Христу приведет, да сподобимся купно с тобою во веки пети: Аллилуиа.

Сей Кондак читается трижды, затем Икос 1 и Кондак 1.

Молитва святителю Иннокентию Херсонскому

О всезлатая уста слова, всехвальный и всечестный архиерею, святителю Христов Иннокентие! Ты многая и различная дарования от Господа приял еси, и, яко раб благий и верный, вся данныя тебе таланты добре умножил еси, и всеми же сими Церкви Христовой и Отечеству славне послужил еси. Ныне же велие на Небесех имея дерзновение ко Святей Троице, призри милостивно от обителей горних на нас, немощных, грехами многими обремененных.

Умоли Господа Вседержителя, да отвратит от нас гнев Свой, праведно по делом нашим на ны движимый и обратит нас на путь покаяния; богоненавистное же заблуждение языческое, зловредное нечестие агарянское, вся ереси богохульныя, расколы, от единыя Церкве отчуждающия, да истребит и да избавит ны от соблазнов мира и козней диавольских.

Ей, крепкий столпе церковный, сосуде благодати предъизбранный, испроси от Отца светов, да соблюдет нас от нечестивых и душепагубных лжеучений, неверия и суеверия, умудрит и укрепит ны даже до конца ко хранению веры Православныя, да сохранит малое стадо Свое неразсеянное пребыти в любви и единомыслии, неверныя же к познанию истины да обратит, да подаст пастырем Церкви ревность о спасении пасомых, монашествующим в подвизе укрепление, миру умирение, земли нашея от нахождения иноплеменных, от крамолы и нестроений сохранение.

О ходатаю теплый, пречудный Иннокентие, испроси от Бога нам время на покаяние и жития нашего исправление, во всех нуждах, скорбех и искушениях скорое поможение, терпение же и укрепление и согрешений прощение; испроси всяк дар, коемуждо благопотребен, яже ко спасению, и от вечных мук и огня геенскаго избавление.

Да тако благодатию и человеколюбием в Троице покланяемаго Бога сподобимся наследники быти Царствия Небеснаго, да прославляем вкупе с тобою всех благих Подателя Бога, Отца и Сына и Святаго Духа, ныне и присно и во веки веков. Аминь.

Тропарь святителю Иннокентию Херсонскому, глас 4

От юных лет прилежа учению благочестия и страху Божию, во благодати Христовой преуспевая, стяжал еси словесная дарования и явился еси неутомимый проповедник спасения, души верных озаряя спасительными смыслы и приводя всех ко исправлению, святителю отче Иннокентие, моли Христа Бога дати нам оставление грехов и велию милость.

Кондак святителю Иннокентию Херсонскому, глас 3

Земли нашея цвете, Церкве херсонския украшение, Православия наставниче преславный, защитниче и молитвенниче Отечества усердный, новый русский Златоусте, богомудре святителю Иннокентие, моли Христа Бога спастися душам нашим.

 

 
Читать другие акафисты раздела "Православные акафисты"
 

Миссионерско-апологетический проект "К Истине"

Читайте также:



© Миссионерско-апологетический проект "К Истине", 2004 - 2016

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru